فەرمی؛ چێڵسی ئەستێرەیەکی پۆرتوگالی گواستەوە
''بازاڕی گواستنەوەی چێڵسی کۆتایی نەهاتووە''
یاریگا –
بازاڕی گواستنەوەی چێڵسی گەرموگوڕە و پێدرۆ نێتۆ، ئەستێرەی وۆڵڤز بووە جەنگاوەرێکی دیکەی ئێنزۆ مارێسکا.
لە کۆتایی هەفتەی رابردوو، چێڵسی و وۆلڤز لەسەر گواستنەوەی نێتۆ بەبڕی 60 ملیۆن یۆرۆ رێککەوتن و دوێنێ شەممە، ئەستێرە پۆرتوگالییەکە پشکنینی پزیشکی لە لەندەن کرد و درەنگانی شەو، لەگەڵ چێڵسی لەسەر تەواوی مەرجەکانی کەسی رێککەوت.
Ready to make his mark in Blue.
Welcome to Chelsea, Pedro Neto! 🔵 pic.twitter.com/XdJvsrdlH5
— Chelsea FC (@ChelseaFC) August 11, 2024
لە وەرزی رابردوودا نێتۆ 20 یاری بۆ وۆڵڤز لە پرێمەرلیگدا کرد، ئەمەش بەهۆی تووشبوونی بە پێکانی ران. نێتۆ لە کۆی وەرزەکە تەنیا دوو گۆڵ و 9 ئەسیستی هەبوو. سەرەڕای کەمی بەشدارییەکانی لە وەرزی رابردوودا، نێتۆ لەلایەن رۆبێرتۆ مارتینێز، راهێنەری پۆرتوگال بانگهێشتی یۆرۆی 2024 کرا و بەشداری لە هەرسێ یارییەکەی قۆناخی کۆمەڵەکاندا کرد.
نێتۆ لە هاوینی ساڵی 2019 لە بڕاگای پۆرتوگالییەوە پەیوەندی بە وۆڵڤزەوە کرد و گرێبەستەکەی لە هاوینی ساڵی 2027 بەسەردەچوو، ئەمەش دوای نوێکردنەوەی گرێبەستەکەی لە ناوەڕاستی ساڵی 2022.
چێڵسی لە گواستنەوەی یاریزانانی ئەم هاوینە زۆر چالاکە و تاوەکو ئێستا گرێبەستی لەگەڵ تۆسین ئادارابیۆیۆ، عومەر کێڵیمان، مارک گیو، کیرنان دیوسبێری هۆڵ، رێناتۆ ڤێگا، کەیڵب ویڵی و ئارۆن ئانسێلمینۆ واژۆ کردووە، جیا لەمەش زۆر لە گواستنەوەی سامو ئۆمۆرۆدیۆن، هێرشبەری ئاتلێتیکۆ مەدرید نزیکە.
