فەرمی؛ ئاتلێتیكۆ مەدرید پاڵەوانێكی جیهانی گواستەوە ریزەكانی

یاریگا –

بەشێوەیەكی فەرمی یانەی ئاتلێتیكۆ مەدریدی ئیسپانی گواستنەوەی جولیان ئالڤارێز ئەستێرەی هەڵبژاردەی ئەرجەنتین و یانەی مانچێستەر سیتی بۆ ریزەكانی یانەكەی راگەیاند.

جولیان ئالڤارێز لە هاوینی ساڵی 2022 بە بەهای 21 ملیۆن یۆرۆ لە ریزەكانی ریڤەر پلەیتەوە پەیوەندی بە مانچێستەر سیتیەوە كرد.

Lo sentimos. Los diseñadores están de vacaciones 😬 pic.twitter.com/8b1W9vwy3x

— Atlético de Madrid (@Atleti) August 12, 2024

هەژماری فەرمی ئاتلێتیكۆ مەدرید لە پلاتفۆرمی ئێكس گواستنەوەی جولیان ئالڤارێزی بۆ ریزەكانی یانەكەی راگەیاند.

ئاتلێتیكۆ مەدرید لە پێناو بەدەستهێنانی تواناكانی جولیان ئالڤارێز 75 ملیۆن یۆرۆ و 20 ملیۆن گۆڕانكاری بە یانە ئینگلیزیەكە داوە ،ئەستێرەكەی تانگۆ بۆ ماوەی پێنج ساڵ و تاوەكو ساڵی 2029 پەیوەندی بە یانە ئیسپانیەكەوە دەكات.

لە بازاڕی گواستنەوەی ئەم هاوینەدا، ئاتلێتیکۆ مەدرید تاوەکو ئێستا رۆبن لۆ نۆرماند، بەرگریکاری ئیسپانیا و ئالێکساندەر سۆرلۆس، هێرشبەری ڤیاڕیال و جولیان ئالڤارێز هێرشبەری ئەرجەنتینی گواستووەتە.

ئالڤارێز وەرزی رابردوو لەگەڵ مانچێستەر سیتی بەشداری لە 54 یاریدا كرد، 19 گۆڵ و 13 ئەسیستی هەبوو. هێرشبەرە ئەرجەنتینییەکە، لەگەڵ تانگۆ نازناوی كۆپا ئەمێریكای بردەوە و دوو گۆڵی لە پاڵەوانیەتیەكەدا کرد.