ئاتاڵانتا شوێنگرەوەی سکاماکای دەستنیشانکردووە

یاریگا –

ئاتاڵانتا کەوتووەتە دۆخی ئامادەباشی و دەیەوێت بەزووترین کات هێرشبەرێک بگوازێتەوە.

تۆڕی وەرزشی سکای سپۆرتس بڵاویکردووەتەوە، لە دوای تووشبوونی جیانلوکا سکاماکا، هێرشبەری ئاتاڵانتا بە پێکان و دوورکەوتنەوەی بۆ ماوەی نزیکەی حەوت مانگ، یانە ئیتاڵییەکە بیر لە جێگرەوەیەک دەکاتەوە.

یانە ئیتاڵییەکە لە نزیکەوە چاودێری ئانتۆنی مارسیال، هێرشبەری پێشووی مانچێستەر یونایتد دەکات، بەڵام هیچ هەنگاوێکی فەرمی نەناوە.

مارسیال لەم هاوینەدا ریزەکانی مان یونایتدی جێهێشت و تاوەکو ئێستا بێ یانەیە، هەرچەندە چەند یانەیەک هەوڵی گواستنەوەیان داوە، بەڵام هیچ یانەیەکی هەڵنەبژاردووە.

بەگوێرەی زانیارییەکانی سکای سپۆرتس، لیلی فەڕەنسی و چەند یانەیەکی ئەمریکا، بەڕازیل و ئیمارات ئامادەن مارسیال بگوازنەوە، بەڵام بە جووڵەیەکی ئاتاڵانتا، رەنگە هەموو هاوکێشەکان بگۆڕێن.

بڕیارە 14ی ئەم مانگە، لە یاری کۆتایی جامی سوپەری ئەوروپا، ئاتاڵانتا و ریال مەدرید لە وارشۆی پایتەختی پۆڵەندا رووبەڕووی یەکترببنەوە.