لویس ئێنریكێ داوای ئەستێرەیەكی نەسر دەكات
یاریگا –
لویس ئێنریكێ، راهێنەری ئیسپانی یانەی پاریس سانجێرمانی فەڕەنسی، داوا لە ئیدارەی یانەكەی دەكات گرێبەست لەگەڵ ئێمریك لاپۆرت ئەستێرەی هەڵبژاردەی ئیسپانیا و یانەی نەسری سعودی واژۆ بكەن.
لاپۆرت لە هاوینی ساڵی 2023 بە بەهای 27 ملیۆن یۆرۆ لە ریزەكانی مانچێستەر سیتیەوە پەیوەندی بە نەسرەوە كرد.
گرێبەستەكەی بەرگریكارە تەمەن 30 ساڵانەكە لەگەڵ نەسر لە هاوینی ساڵی 2026 بەسەردەچێت.
Uno de estos clubs europeos que está interesado es el PSG. El club francés quiere reforzar la posición de central izquierdo y Laporte es una petición expresa de Luis Enrique. https://t.co/ko9LvnVfb6
— Jose Alvarez Haya (@10JoseAlvarez) August 3, 2024
بە گوێرەی زانیارییەكانی بەرنامەی چێرینگویتۆی ئیسپانی، ئێنریكی داوای لە ئیدارەی پاریس سانجێرمان كردووە، بەمەبەستی پتەوكردنی هێڵی بەرگری یانەكەیان گرێبەست لەگەڵ لاپۆرت واژۆ بكەن.
ئاماژە بەوەشكراوە، لە ماوەی رابردوودا ئێنریكێ لەگەڵ پاریس سانجێرمان لە هێڵی بەرگری رووبەرووی كێشەی زۆر بووەتەوە، بەشێك لە یاریزانەكانی تووشی پێكان بوون و بەشێكی دیكەش ئاستیان دابەزیوە.
ئەوەش دووپاتكراوەتەوە، راهێنەرەكەی ئیسپانیا دوای بینینی ئاستی لاپۆرت لەگەڵ هەڵبژاردەی ئیسپانیا لە یارییەكانی جامی نەتەوەكانی ئەوروپای 2024، داوایكردووە گرێبەستی لەگەڵ واژۆ بكەن.
لاپۆرت لەگەڵ هەڵبژاردەی ئیسپانیا لە سەرجەم یارییەكانی جامی نەتەوەكانی ئەوروپای 2024 بەشداری كرد، توانی ئاستێكی بەرز پێشكەش بكات و نازناوەكەش ببەنەوە.
