مان یونایتد یاریزانێکی هەرزانفرۆش دەکات

یاریگا –

مانچێستەر یونایتد نزیکە لە بەڕێکردنی یاریزانێکی هێڵی ناوەند.

مان یو بە راهێنەرایەتی ئێریک تێن هاخ بۆ سێیەم وەرز لەسەریەک، خۆیان بۆ وەرزی نوێ ئامادە دەکەن و چاویشیان لە گۆڕانکاری گەورەیە لە ڕیزەکانی بەتایبەت دوای ئەوەی راهێنەرە هۆڵەندیەکە چەند جارێک پێویستی یانەکەی بۆ هێنانی یاریزانی نوێ بە ئاشکرا راگەیاند.

بەگوێرەی زانیارییەکانی پێگەی کۆت ئۆفسایدی تایبەت بە بازاڕی گواستنەوەکان، مانچێستەر یونایتد ئامادەیە ئەم هاوینە کرستیان ئێریکسن بفرۆشێت.

پێگەکە نرخی ناوبراویشی ئاشکراکردووە بەوەی مان یو بە ئۆفەرێکی تەنها 5 ملیۆن یۆرۆییش رازی دەبێت.

ئەستێرە دانیمارکیەکە کە ئێستا تەمەنی 32 ساڵە، وەرزی رابردوو لەگەڵ یانەکەی لە پرێمەرلیگ لە 22 یاریدا بەشداریپێکرا. تەنها گۆڵێک و دوو ئەسیستی هەبوو.

هەر بەپێی هەمان سەرچاوەی سەرەوە، یانەکانی ئاندەرلەختی بەلجیکی و ئایاکسی هۆڵەندی خواستی حۆیان بۆ گواستنەوەی پیشانداوە.

بۆ بیرخستنەوە، ئیرکسن ساڵی 2022 وەک یاریزانێکی ئازاد روویکرده مانچێستەر یونایتد. ئەوە دوای بەسەربردنی 7 ساڵ لەگەڵ تۆتنهام و، دواتر لە 2020 تا 2021 لەگەڵ ئینتەر میلان و پاشان برێنتفۆردی ئینگلیزی.