ڤینیسیۆس و ڤالڤێردی و کرووس ئەو بەڵێنەی بە یەکترییان دابوو بردیانە سەر

یاریگا –

کرووس و ڤینیسیۆس و ڤالڤێردی ئەو بەڵێنەی بە یەکترییان دابوو بردیانە سەر و رەنگی قژیان پلاتینی کردووە.

رۆژنامەی ئاسی ئیسپانی ئاشکرایکردووە، هەریەکە لە تۆنی کرووس ناوەڕاستکاری ئەڵمانی، ڤینیسیۆس جۆنیۆر هێرشبەری بەڕازیلی و فێدریکۆ ڤالڤێردی ناوەڕاستکاری ئۆرۆگوایی لە سۆشیاڵ میدیا بە ستایلێکی نوێی قژیان دەرکەوتوون، هەر سێکیان رەنگی قژیان کردووەتە پلاتینی.

رۆژنامە مەدریدییەکە ئاشکرایکردووە، ئەو سێ یاریزانەی ریال مەدرید پێش یاریی کۆتایی چامپیۆنزلیگ بەرامبەر بۆڕووسیا دۆرتموند بەڵێنیان دابوو، ئەگەر نازناوی چامپیۆنزلیگ بەدەست بهێنن رەنگی قژیان بکەنە پلاتینی، هەرسێکیان دوای بەدەستهێنانی نازناوی پازدەمینی چامپیۆنزلیگ لەگەڵ مێرەنگی، بەڵێنەکانیان بردووەتە سەر و رەنگی قژیان کردووەتە پلاتینی، لەم رۆژانەی دوایی هەرسێکیان لە سۆشیاڵ میدیا بە قژی پلاتینییەوە دەرکەوتن.

پێشتر چەند جارێک ڤالڤێردی ئاشکرایکردبوو، گرەوی کردووە ئەگەر نازناوی چامپیۆنزلیگی ئەم وەرزە بباتەوە، رەنگی قژەکەی دەکاتە پلاتینی.

رۆژی 1ـی یۆنیۆ/حوزەیرانی 2024 ریال مەدرید لە یاریگای وێمبلی 2-0 لە دۆرتموندی بردەوە و بۆ جاری پازدەمین نازناوی چامپیۆنزلیگی بردەوە کە دانی کارڤاخال و ڤینیسیۆس جۆنیۆر گۆڵەکانی یارییەکەیان بۆ مەدریدییەکان کرد.