زاخۆ لەبارەی شێرکۆ کەریم بڕیاری کۆتایی دا و دەیەوێت هێرشبەرێکی هەڵبژاردەی عێراق بگوازێتەوە

یاریگا –

زاخۆ لەبارەی شێرکۆ کەریم بڕیاری کۆتایی دا و چیدیکە ئەو یاریزانەی ناوێت.

بەگوێرەی بەدواداچوونی تۆڕی وەرزشی یاریگا، یانەی زاخۆ بڕیاریداوە لە کێبڕکێی گواستنەوەی شێرکۆ کەریم بکشێتەوە و چیدیکە هەوڵی گواستنەوەی ئەو یاریزانە نادات، تەنانەت بەرپرسانی یانەی زاخۆ پەشیمانن لەوەی هەوڵی گواستنەوەی ئەو یاریزانەیان داوە.

شێرکۆ کەریم لە نوێکردنەوەی گرێبەستەکەی لەگەڵ یانەی هەولێر نزیکبووەتەوە، بەڵام تاوەکو ئێستا گرێبەستە نوێێەکەی واژۆ نەکردووە، کە لە گواستنەوەی هاوینە و زستانەی رابردووش دەنگۆی چوونی بۆ ریزەکانی یانەی زاخۆ هەبوو.

بەگوێرەی زانیارییەکانی تۆڕی وەرزشی یاریگا، زاخۆ لەگەڵ موهەنەد عەلی هێرشبەری پێشووی یانەی شوڕتە دەستی بە گفتوگۆ کردووە و زاخۆ دەیەوێت میمی بگوازێتەوە ریزەکانی، کە ئەو هێرشبەرەی هەڵبژاردەی عێراق لە پشکنینە پزیشکییەکانی بۆ چوونی بۆ یانەی تراکتۆرسازی ئێرانی شکستی هێنا.

موهەنەد عەلی (24 ساڵان) لەگەڵ هەڵبژاردەی عێراق لەوەتەی ساڵی 2017 یاریی دەکات و لە 43 یاری 19 گۆڵی بۆ شێرەکانی رافیدەین کردووە و پێشتر یاریی بۆ یانەکانی دوحەیلی قەتەڕی و سیلیەی قەتەری و ئاریس سالۆنیکی یۆنانی کردووە.