فەڕەنسا بە توندی رووبەڕووی هەوەسبازی دەبێتەوە

یاریگا –

پۆلیسی فەڕەنسا تیمی تایبەتی بۆ رووبەڕووبوونەوەی هەوەسبازی نایاسایی لە ماوەی یارییەکانی ئۆڵێمپیاد پێکهێناوە.

نووسینگەی میدیایی پۆلیسی پاریس بڵاویکردووەتەوە، تەواوی دەزگاکانی ئەمنی کار لەسەر رووبەڕووبوونەوەی هەوەسباسی ‘کاری سێکسی’ نایاسایی دەکەن و چەندین خاڵی پشکنینیان لە گەڕەک و کۆڵانەکانی پاریس داناوە.

تیمێکی تایبەتی پۆلیسی پاریس، چاودێری یانەکانی شەوانەی پاریس دەکەن، پۆلیسی پاریس بە هەماهەنگی لەگەڵ نووسینگەی داواکاری گشتی، بڕیاری توند لە دژی هەوەسبازی نایاسایی دەردەکەن.

کەناڵی فرانس24 بڵاویکردووەتەوە، رێژەی هەوەسبازی نایاسایی بەرزنەبووەتەوە، چونکە بەهۆی ئۆڵێمپیادەوە، نرخی هۆتێلەکان بەرزبووەتەوە و ‘سۆزانییەکان’ ناتوانن بەرگەی بەرزی نرخی ئێستای پاریس بگرن، بۆیە ژمارەیان کەمبووەتەوە.

فەڕەنسا لە ساڵی 1946 ماڵەکانی تایبەت بە کاری ‘سێکسی’ قەدەخەکرد و لە ساڵی 2016 بڕیاریدا، سزای توندی ئەو کەس و لایەنانە بدرێت، کە بانگەشەی ئاشکرا بۆ هەوەسبازی دەکەن و تەنانەت پارەدان لە پێناو سێکسی بەیاسا قەدەخەکرد.