بریکارەکەی ئانتۆنی لەسەر بڵاوبوونەوەی دەنگۆیەک هاتە دەنگ
یاریگا –
ئاستی دوو وەرزی لەگەڵ مانچێستەر یونایتد گومانی لە مانەوەی ئانتۆنی دروستکردووە و بەم دوایانەیش دەنگۆ هەبوو ناوبراو بە خواستن بنێردرێتە دەرەوە.
یاریزانە بەڕازیلیەکە هاوینی 2022 بە بڕی 100 ملیۆن یۆرۆ وەک سێیەم گرانبەهاترین گرێبەست لە مێژووی مان گواسترایەوە، نەیتوانی لە ئاست چاوەڕوانیەکاندابێت و هەمان وەشانی پێشوی لە ئایاکس، پێشکەشی هاندەرانی مان یونایتد بکات.
لە وەڵامی ئەوەی ئایا ئەم هاوینە بەخواستن دەڕوات، جونیۆر پێدرۆسۆی بریکاری یاریزانەکە بە ڕۆژنامەنووسانی وت
منیش ئەو راپۆرتانە دەبینم کە باس لە چوونەدەرەوەی دەکەن بە خواستن. بەڵام پلانی ئانتۆنی روونە: تەنها مانچێستەر یونایتدە.
ئەو دەیەوێ بمێنێتەوە. تەنها بیریشی لای مان یوە. لەسەر ئەم بابەتەیش قسەمان لەگەڵ یانەکە کردووە.
ئانتۆنی کە وەرزی رابردوو لە 29 یاری خولی ئینگلیزی تەنیا گۆڵێک و ئەسیستێکی هەبوو، بە گرانترین گرێبەستی فرۆشتن دادەنرێت کە لەگەڵ یاریزانێکی خولی هۆڵەندیدا ئەنجامدرابێت.
