مووچەی یۆرۆ لە یونایتد نزیکە لە مووچەی باشترینەکان لە مەدرید!
ریاڵ مەدرید تێناگات لەوەی چۆن مانچێستەر یونایتد بڕە پارەیەکی خەیاڵی تەرخانکرد بۆ گواستنەوەی یاریزانێک کە تەنها یەک وەرز لە گرێبەستەکەی ماوە و هەروەها لە سەروو ئەوەش مانچێستەر مووچەیەکی زۆری بۆ داناوە.
مەدرید پێی وابوو هیچ یانەیەک ئەو بڕە پارەیە نادات کە لیل داوای دەکات چونکە ساڵی داهاتوو گرێبەستی لێنی یۆرۆ بەسەدەرچێت و ئەوکات بێ بەرامبەر دەتوانێت رووبکاتە مەدرید یان هەر یانەیەکی دیکە کە بیەوێت. بەڵام مانچێستەر یونایتد 50 ملیۆن یۆرۆی جێگیر و 12ملیۆنی گۆڕاو دەداتە لیل
ئەرکی دووهەمی یونایتد رازیکردنی یاریزانەکە بوو. یۆرۆ تەمەنی تەنیا 18 ساڵە بەڵام لە یانە تازەکەی بڕی 9 ملیۆن یۆرۆی ساڵانە وەردەگرێت و لە مەدرید هەرگیز ئەو مووچەیەی پێنەنەدرا. جگە لە کیلیان ئێمباپێ، مووچەی ئەستێرەکانی دیکەی وەک بێڵینگهام و ڤینیسیوس 11-12 ملیۆن یۆرۆیە، کەچی لێنی لە شەیتانە سوورەکان 9 ملیۆن وەردەگرێت.
لەم ساڵانەی دواییدا جیاوازییەکی زۆر گەورە هەیە لە نێوان ئەو بڕە پارەیەی یانەکانی ئینگلتەرا خەرجی دەکەن بەرامبەر بە سەرجەم خولەکانی دیکە. هەرچەندە مەدرید لە دۆخێکی دارایی زۆر باشدایە بەڵام سیاسەتی ئیستایان هێنانی یاریزانی لاوە و مووچەی زۆر بەرزیش تەنها بۆ ئەو یاریزانانەیە کە بێ بەرامبەر دێنە یانەکە.
