یامال تاوەکو ئیستا چەند ژمارەی پێوانەیی بەناوی خۆیەوە تۆمار کردووە؟

یاریگا –

لامین یامال کە تازە تەمەنی بووەتە 17 ساڵ، لە وەرزی رابردووە تاوەکوو ئێستا لەماوەی یەک ساڵ کاروانی پیشەگەریدا چەندین ریکۆردی شکاندووە کە پێش ئەو هەیچ یاریزانێک ئەو ئامارانەی نەبووە.

یەکێک لە ئەستێرە لاوەکانی تۆپی پێی ئەوروپا وەرزی رابردوو لامین یامال بووە. ئەستێرەی تەمەن 17 ساڵەی بارسێلۆنا و هه ڵبژاردەی ئیسپانیا، سەرەرای تەمەنی لاوی، له نێو یاریگادا بەرزترین ئاست پێشکەش دەکات و دەدرەوشێتەوه و سەرنجی هەمووان رادەکێشێت. لە پاڵەوانیەتی یۆرۆی 2024 بە شێوەیەکی درەوشاوە دەرکەوت و یەکێک بوو لە پارچە سەرەکییەکانی هەڵبژاردەی ئیسپانیا لە بوون بە پاڵەوانی هەڵبژاردەکەی. لە کۆتایی ئەم پاڵەوانێتییەدا، یامال وەک باشترین یاریزانی لاوی یۆرۆ هەڵبژێردرا. دەنگۆی ئەوە هەیە کە چانسی زۆری بۆ وەرگرتنی خەڵاتی گۆڵدن بۆی هەیە.

تا ئێستا هێرشبەرە لاوەکە چەندین ژمارەی پێوانەیی تۆمار کردووە لەوانەش وەک، بچووکترین گۆڵکاری مێژووی لالیگا، بچووکترین گۆڵکاری مێژووی جامی شای ئیسپانیا، بچووکترین گۆڵکاری مێژووی هەڵبژاردەی ئیسپانیا، بچووکترین گۆڵکاری جامی سوپەری ئیسپانیا، دواجاریش بچووکترین گۆڵکاری مێژووی یۆرۆ، ئەوانە ئەو ژمارە پێوانەییانەن کە یامال لەماوەی یەک ساڵی یاریی کردنی دا تۆماری کردوون و بچووکترین یاریزانە کە لە یارییەکی لالیگادا 2 گۆڵی کردبێت.

یامال جیا لە گۆڵکردن بچووکترین یاریزانە کە لە قۆناغی پێش کۆتایی چامپیۆنزلیگ و قۆناغی کۆتایی یۆرۆ یاری کردبێت، بچووکترین یاریزانە کە بە درێسی بارسێلۆنا 50 یاری ئەنجام دابێت، بچوکترین یاریزانە کە نازناو لەگەڵ هەڵبژاردە بباتەوە. هەروەها خاوەنی ریکۆردی لاوترین یاریزانە لە تۆمارکردنی ئەسیست لە پاڵەوانێتییەکانی لالیگا و یۆرۆ و چامپیۆنزلیگدا.