یاریگا –
کاردانەوەکانی دروشمی رەگەزپەرستی یاریزانانی ئەرجەنتین و بە تایبەتی ئێنزۆ فێرناندێز بەردەوامن.
لە دوای بردنەوەی نازناوی کۆپا ئەمێریکا، ئێنزۆ ڵایڤێکی لە پلاتفۆڕمی ئینستاگرام کردەوە و لەگەڵ هاوتیمەکانی گۆرانیان دەگووتەوە کە چەندین دروشمی رەگەزپەرستی و جیاکاری تێدابوو. ئامانج لە دروشمەکانی یاریزانانی ئەرجەنتین، یاریزانانی هەڵبژاردەی فەڕەنسا بوو.
چێڵسی بەیاننامەیەکی لەسەر رووداوەکە بڵاوکردەوە و دووپاتیدەکاتەوە، بە هەموو شێوەیەک رەگەزپەرستی رەتدەکەنەوە
چێڵسی تەواوی شێواز و فۆڕمەکانی جیاکاری رەگەزی رەتدەکاتەوە و بە هیچ شێوەیەک قبووڵ ناکرێت. شانازی بە یانەکەمان دەکەین، چونکە یانەیەکی گشتگیر و تێکەڵە، ئەندامان لە هەموو کولتوور و کۆمەڵگەیەک و ناسنامەیەک، هەست بە ئارامی و پێشوازی دەکەن. رێز لە داوای لێبووردنی گشتی یاریزانەکە دەکەین و ئەمەش دەکەینە دەرفەتێک بۆ پەروەردەکردنی زیاتر. یانەکە لەسەر ئاستی ناوخۆ، رێکاری تەمبێکاری گرتووەتەبەر.
Chelsea FC has published the following statement…
— Chelsea FC (@ChelseaFC) July 17, 2024
درەنگانێکی شەوی رابردوو، ئێنزۆ فێرناندێز، بەیاننامەیەکی بە زمانی ئینگلیزی لە ئینستاگرام بڵاوکردەوە و داوای لێبووردنی کرد و دووپاتیکردەوە، دژی هەموو جۆرە رەگەزپەرستیێکە.
دەمەوێت لەدڵەوە داوای لێبووردن لەبارەی ئەو ڤیدیۆیەی بڵاوکراوەتەوە بکەم. گۆرانییەکە بە زمانێکی توند نووسراوەتەوە و هیچ بیانووێک بۆ ئەم وشانە نین. بە هەموو جۆرێک دژی رەگەزپەرستی دەوەستم و داوای لێبووردن دەکەم، چونکە کەوتبوومە نێو قووڵایی ئاهەنگەکانی بردنەوەی کۆپا ئەمێریکا. ڤیدیۆ و وشەکان، بەهیچ شێوەیەک ئاوێنەی بیرکردنەوە و کەسایەتی من نین. زۆر داوای لێبووردن دەکەم.
بەیاننامەکەی ئێنزۆ دوای کاردانەوەیەکی توندی وێسلی فۆفانا، هاوتیمی لە چێڵسی و یاریزانی هەڵبژاردەی فەڕەنسا بڵاوکرایەوە، کاتێک فۆفانا پۆستەکەی ئێنزۆی ریپۆست کرد و لەسەری نووسی؛ تۆپی پێ لە 2024: رەگەزپەرستی لەڕوو.
Le football en 2024 : racisme décomplexé 🤦🏽♂️🤦🏽♂️🤦🏽♂️ pic.twitter.com/MGkH5wPmNU
— Wesley Fofana (@Wesley_Fofana3) July 16, 2024
فێرناندێز تاوەکو ئێستا 28 یاری بۆ هەڵبژاردەی ئەرجەنتین کردووە و خاوەنی چوار گۆڵە. لە کۆپا ئەمێریکای رابردوو دوو ئەسیستی لە پێنج یاریدا کرد.
