بڕیار لەسەر چارەنووسی گرینوود درا

یاریگا –

چیرۆکی جیابوونەوەی مەیسن گرینوود و مانچێستەر یونایتد گەیشتە کۆتایی.

زۆربەی رۆژنامەکانی بەریتانیا بڵاویانکردووەتەوە، مانچێستەر یونایتد و مارسیلیا لەسەر گواستنەوەی گرینوود رێککەوتوون و ئێستا یاریزانەکە گفتوگۆی لەگەڵ یانە فەڕەنسییەکە دەستپێکردووە.

رۆژنامەی دەیلی مەیڵ بڵاویکردووەتەوە، گرینوود بەبڕی 27 ملیۆن پاوەند و سێ ملیۆن پاوەندی پەیوەست بە پاداشتەوە، پەیوەندی بە مارسیلیا دەکات.

دەمێکە گرینوود بە زارەکی لەگەڵ مارسیلیا و مان یونایتد رێککەوتووە، بەڵام تەواوی وردەکارییەکانی گرێبەستەکە یەکلایینەکراونەتەوە.

پێشبینی دەکرێت، ئەمڕۆ گرینوود گەشتی فەڕەنسا بکات و پشکنینی پزیشکی بۆ تیمەکەی رۆبێرتۆ دی زێربی بکات.

لە وەرزی رابردوودا، گرینوود بە خواستن یاری بۆ خێتافی کرد، لە کۆی 36 یاریدا 10 گۆڵ و شەش ئەسیستی بۆ یانە مەدریدییەکە کرد.

لە ماوەی رابردوودا، یانەکانی یوڤێنتوس، بارسێلۆنا و ئەیسی میلان هەوڵی گواستنەوەی گرینوودییاندا، بەڵام لە کۆتاییدا مارسیلیا یەکلاییکردەوە.