یاریگا –
ریال مەدرید گرێبەستێکی گرانبەهای پێشکەش بە دانی کارڤاخال کردووە و پێشبینی دەکرێت بەم نزیکانە گرێبەستە نوێیەکەی لەگەڵ مەدرید واژۆ بکات.
دانی کارڤاخال وەرزی 2023/2024ی بە جوانترین شێوە کۆتایی پێهێنا. ئەو لەگەڵ ریال نازناوی جامی سوپەر و لالیگا و چامپیۆنزلیگی بردەوە، لەگەڵ ئیسپانیاش یۆرۆی 2024ی بەدەستهێنا و پارچەیەکی جێگیر و کاریگەر بوو لە هەردوو یانەی ریال و لارۆخا. یەکەم گۆڵی مێرەنگی بەرامبەر دۆرتمۆند لە یاری کۆتایی چامپیۆنزلیگ تۆمارکرد، لە هەموو یارییەکانی یۆرۆدا جگە لە یەک یاری کە سڕکرابوو، لە پێکهاتەی سەرەکیدا بوو.
ئاستە درەوشاوەکانی لە یارییەکەی بەرامبەر ئەڵمانیا و یاری کۆتایی بەرامبەر ئینگلتەرا لەبیرنەکراوە و نەک هەر پاڵێوراوێکە بۆ بەدەستهێنانی خەڵاتی باڵۆن دۆر، بەڵکو زۆرێک ئێستا بە باشترین بەرگریکاری راست لە جیهاندا ناوی دەبەن.
بە گوێڕەی هەواڵی رۆژنامەی مارکا، ریال مەدرید بەهای کاپتنەکەی دەزانێت و گرێبەستی یەک ساڵەی تا مانگی حوزەیرانی 2026ی پێشکەش کردووە. موچەی کارڤاخال بەشێوەیەکی بەرچاو زیاد دەکات و ریال گەشبینە بەوەی بەم نزیکانە گرێبەستە نوێیەکەی واژۆ بکات.
خاڵی گرنگ پاراستنی یاسای لۆس بلانکۆس لە درێژکردنەوەی گرێبەست لەگەڵ یاریزانانی سەروو 30 ساڵ تەنیا یەک ساڵە تەنانەت کارڤاخالیش لەوە بێبەری نییە.
