یانەی رۆما توانیوییەتی ئەلیکساندەر سۆرلۆزی گۆڵکاری ڤیاریاڵ رازی بکات کە پەیوەندی بە یانەکەیانەوە بکات.
هێرشبەرە نەرویژییەکە پارساڵ 23 گۆڵی لە لالیگا تۆمارکرد و تەنها بە جیاوازی یەک گۆڵ، ناسناوی گۆلکاری خولەکەی لەدەستدا. بەگوێرەی کۆریێری دیلۆ سپۆرت، ناوبراو ئامادەیە ڤیاریاڵ بەرەو پایتەختی ئیتاڵیا جێبهێڵێت و پەیوەندی بکات بە رۆماوە.
سزای هەڵوەشاندنەوەی گرێبەستەکەی سۆرلۆز 38 ملیۆن یۆرۆیە و رۆما دەیەوێت ڤیاریاڵ بە بڕە پارەیەکی نزیک لە سزای هەڵوەشاندنەوە رازی بکات و تەواوی پارەکە نەدەن. بەگووتەی سەرچاوەکە پێشنیازی رۆما 25 ملیۆنی جێگیر و 5 ملیۆنی دیکەیە بەپێی ئاست و ئەنجام.
رۆما لە هاوینی ئەمساڵدا لە هێڵی پێشەوە هەریەک لە ئەندریە بێلۆتی، سەردار ئەزموون و رۆمێلو لوکاکۆی لەدەستداوە. بێلۆتی فرۆشرا بە کۆمۆ و سەردار و لوکاکۆش ماوەی خواستنەکەیان کۆتایی هات.
یانەکە دەیەوێت بەشێک لە پارەی گواستنەوەی سۆرلۆزی لە فرۆشتنی حوسام عەوار و ریک کارسدرۆپ دەست بکەوێت و کۆریێری دەڵێت بە هەردووکیان نزیکەی 15 ملیۆن یۆرۆ دەکەن. بۆ تەواوکردنی پارەکەش رەنگە ناچاربن تامی ئەبراهامی ئینگلیزی بفرۆشن.
