هاری کەین داوای کۆبوونەوەی بەپەلەی لە یاریزانی ئینگەڵتەرا کردووە
یاریگا –
هاری کەین، کاپتنی هەڵبژاردەی ئینگلتەرا، کۆبونەوەیەکی بەپەلەی لەگەڵ یاریزانانی هەڵبژاردەکەی لە کەمپی سێ شێرەکان ئەنجامدا.
هەڵبژاردەی ئینگلتەرا هەنگاوێک لە سەرکەوتن بۆ قۆناغی 16 جامی نەتەوەکانی ئەوروپای 2024 دوورە، بەڵام سەرەڕای سەرکەوتنی لە یەکەم یاری بەرامبەر سربیا، ئاستی ئەم تیپە لەم یارییەدا و هەروەها لە یارییەکەی بەرامبەر هەڵبژاردەی دانیمارک کە یەکسان بوون، رەخنەی زۆر لە ستافی تەکنیکی و یاریزانانی ئەم تیپە گیرا.
بوونی ئەستێرەی گەورە و درەوشاوە لە پێکهاتەی ئەم تیپەدا وایکردووە چاوەڕوانییەکی زۆریان لێبکرێت، بەڵام ئینگلتەرا نەیتوانیوە تا رادەی ناوی ئەو یاریزانانە دەربکەوێت و پێدەچێت ئەگەر لەم رەوتە بەردەوام بێت ئەوا لە قۆناغەکانی داهاتوو رووبەڕووی کێشەی جددی دەبنەوە کە کاریگەری لەسەر بارودۆخیان دەبێت.
بە گوێڕەی هەواڵێکی رۆژنامەی سان، کەین دوێنێ کۆبوونەوەیەکی بەپەلەی لە کەمپی سێ شێرەکان لە ئەڵمانیا ئەنجامداوە بەمەبەستی بەرزکردنەوەی ورەی یاریزانان و بیریان بخاتەوە کە دەبێت لە سێیەم یاری کۆمەڵەکەدا بە تەواوی هێزەوە دەربکەون و بڕۆنە گۆڕەپان.
لە سێیەمین یاری قۆناغی کۆمەڵەکانی یۆرۆی 2024، دەبێت هەڵبژاردەی ئینگلتەرا رۆژی سێشەممە بەرامبەر هەڵبژاردەی سلۆڤینیا یاری بکات و پێناچێت ئەرکێکی قورسیان لەپێش بێت، بەڵام هەلومەرجەکە وایکردووە هاندەرانی ئەم هەڵبژاردەیە تەنانەت بۆ ئەم یارییەش کەمێک نیگەران بن.
