بۆچی یاریزانێکی بڕازیلی پێش کۆپا ئەمریکا ستایلی قژە پەمەییەکەی گۆڕیوە؟

یاریگا –

بەرگریکارێکی بڕازیلی پێش کۆپا ئەمریکا لەسەر داوای هەڵبژاردەکەی رازی بووە، ستایلی قژە پەمەییەکەی بگۆڕێت لەکاتێکدا ماوەیەکی زۆرە بەو ستایلە دەردەکەوێت.

ماڵپەڕی ئەتلەتیکی ئەمریکی ئاشکرایکردووە، یان کۆتۆ بەرگریکاری یانەی جیرۆنای ئیسپانی و هەڵبژاردەی بڕازیل لەسەر داوای هەڵبژاردەکەی ستایلی قژە پەمەییەکەی گۆڕیوە و لە دوایین یارییە دۆستانەکانی هەڵبژاردەکەی قژە پەمەییەکەی نەهێشتبوو.

یان کۆتۆ لەبارەی گۆڕینی ستایلی قژی دەڵێت :’داوایان لێکردم ستایلی قژم بگۆڕم، پێیان گوتم ستایلەکە کەمێک گەمژانە دەردەکەوێت، هەرچەندە من لەگەڵ ئەو بۆچوونەدا نیم، بەڵام قبوڵم کرد و رێزم لەو داواکارییە گرت، من بە درێژایی ئەم وەرزە بە قژی پەمەیی یاریم دەکرد و بژاردەی خۆم بوو، وەرزێکی نایابمان بەڕێکرد’.

یان کۆتۆ بەبێ ئەوەی ئاشکرای بکات داواکارییەکەی لەلایەن فیدراسیۆنی تۆپی پێی بڕازیل یان دەستەی راهێنەرانەوە لێکراوە، دەشڵێت :’لەوانەیە ستایلی قژەکەی من پەیوەندی بەوەوە هەبێت لە جیرۆنا زۆربەی یاریزانەکان قژیان بۆیە دەکەن، بۆیە لەوێ بۆیەکردنی قژ بەشێکە لە فاشیۆن و سەرنجڕاکێشی، بەڵام لە بڕازیل دۆخەکە گۆڕاوە ئیتر یان قژم بۆیەی رەش دەکەم، یان هەروا بە سروشتی خۆی دەبێت’.

یان کۆتۆ (22 ساڵان) ئەم وەرزە لەگەڵ جیرۆنا لە سەرجەم پاڵەوانێتییەکان 39 یاریی ئەنجام داوە، مانگی ئۆکتۆبەری ساڵی رابردوو بۆیەکەمجار بانگهێشتی هەڵبژاردەی بڕازیل کرا و لەوکاتەوە چوار یاریی بە درێسی سێلیساو کردووە.

کۆتۆ لە دوایین یاریی بڕازیل بەرامبەر ئەمریکا کە 1-1 یەکسانبوون، لەسەر کورسی یەدەک دانیشتبوو، کە رۆژی 24ـی ئەم مانگە سەماکارانی سامبا لە یەکەم یارییان لە کۆپا ئەمریکای 2024 رووبەڕووی کۆستاریکا دەبنەوە.