یاریگا –
وا دیارە هێشتا خۆری ماوریسیۆ پۆچێتینۆ لە ئینگلتەرا ئاوا نەبووە دوای سەردەمە بێ ئاکامەکانی لەگەڵ تۆتنهام (2014-2019) و هەروەها چێڵسی لە مانگی ئایاری 2023 تا ئایاری ئەم ساڵ، وا هەلێکی دیکەی بۆ هاتووەتە پێشەوە هەر لە یانەیەکی ئەو خولە.
بەگوێرەی زانیارییەک لە پێگە و تۆڕە کۆمەڵایەتییەکانی نزیک لە مانچێستەر یونایتدەوە بڵاوکراوەتەوە، پۆچێتینۆ لە پێشی رکابەرایەتی وەرگرتنی پۆستی یانەکەوە دێت و لە ئەگەری دوورخستنەوەی ئێریک تێن هاخ لەلایەن گروپی ئینیۆس کە خاوەندارێتی 27.7%ی مان یو دەکەن، ئەوا ڕاهێنەرە ئەرجەنتینیەکە لە بژاردە لەپێشینەکانیان دەبێت.
مانچێستەر یونایتد بە راهێنەرایەتی تێن هاخ بۆ دووەم وەرز، وەرزێکی نابەدڵیان بەڕێکرد بە جۆرێک گەر بردنەوەی جامی یەکێتی ئینگلتەرای مسۆگەر نەکردایە، بە ئەگەرێکی زۆرەوە هەر لە دوای یارییە گەورەکەی وێمبڵی دووردەخرایەوە.
بیرکردنەوە لە پۆچێتینۆ لە کاتێکدایە ئەم راهێنەرەی پێشووتری پاریس سان نێرمان و ئیسپانیۆل هیچ نازناوێکی لەگەڵ یانە ئینگلیزیەکان نەبردووەتەوە کە سەرپەرشتی کردوون.
