ئیندۆنیزیا بەدوای سەرکەوتنێکی مێژوویی دەگەڕێت بەرامبەر هەڵبژاردەی عێراق

یاریگا-

سبەی پێنج شەممە ( 6ـی حوزەیران/ یۆنیۆی 2024) گەڕی پێش کۆتایی یارییەکانی پاڵاوتنی مۆندیالی 2026 بەڕێوەدەچێت.

هەلبژاردەی عێراق وێڕای مسۆگەر کردنی سەرکەوتنی بۆ قۆناخی کۆتایی پاڵاوتنەکان، ڤیکتۆر کاساس ئەوەی دووپات کردەوە کە بۆ سەرکەوتن یاری دەکەن و مەبەستیانە لەم یاریە چەند یاریزانێکی تازە بانگهێشتکراو بۆ هەڵبژاردەکە تاقی بکەنەوە، لە کۆنگرە ڕۆژنامەوانیەکەی ئەمڕۆ کاساس باسی لە کەش و هەوای وڵاتی ئیندۆنیزیا کرد و گوتی رووبەڕووی زەحمەتیەکی زۆر بوینەتەوە بەهۆی ئەو شێیە زۆرە لەم وڵاتە هەیە و بە یاریزانەکانم راگەیاندووەشلەمەنی زۆر بحۆن بۆ ئەوەی تووشی گرفتی تەندروستی نەبن.

لە مێژوودا هەردوو هەڵبژاردە نۆ یاریان بەرامبەر یەکتر کردووە، لە هەشت یاریدا عێراق براوە بووە و یەک یاریش یەکسان بوونە، عێراق 23 گۆڵی تۆمار کردووە و ئیندۆنیزیاش تەنها پێنج گۆڵی تۆمار کردووە.

یاری هەر دوو هەڵبژاردە لە کۆمەڵەی شەشەمی پاڵاوتنی مۆندیالی 2026ە و هەڵبژاردەی عێراق لە ڕیزبەندی یەکەمە بە 12 خاڵ و ئیندۆنیزیاش بە حەفت خاڵ لە ڕیزبەندی دووەم دێت، یاریەکەش کاتژمێر 12ـی نیوەڕۆ بە کاتی عێراق لە یاریگای گیلۆرا بۆنگ کارلۆ بەڕێوەدەچێت کە تا ئێستا 60 هەزار لە بلیتەکانی یاریەکە فرۆشراوە.