ئەستێرەیەکی پێشووی بارسێلۆنا پاڵپشتی ریال مەدرید دەکات
یاریگا –
گاری لینیکر، ئەستێرەی پێشووی ئینگلیزی بارسێلۆنا، لە یارییەکەی ئەمشەودا پاڵپشتی ریال مەدرید دەکات.
ریال مەدرید ئەمشەو لە یاری کۆتایی چامپیۆنزلیگ رووبەڕووی دۆرتمۆند دەبێتەوە. زۆرێک پێیان وایە یاریزانانی کارلۆ ئەنچیلۆتی پاڵێوراوی سەرەکین بۆ بەدەستهێنانی نازناوەکە.
لەکاتێکدا یاریزانانی پێشووی بارسێلۆنا هەمیشە پاڵپشتی تیمی بەرامبەری ریالیان کردووە، بەڵام ئەمجارە لینیکر پۆستێکی لە پەیجی فەرمی خۆی لە تۆڕی کۆمەڵایەتی ئێکس بڵاوکردەوە، ئاماژە بە یەکێک لە پۆستەکانی دۆرتمۆند دەکات و نووسیویەتی:
” بۆ یەکەمجار لە یاری کۆتایی رکابەرییەکانی چامپیۆنزلیگ “پشتیوانی ریال مەدرید دەکەم.
First time I’ll be cheering for @realmadriden in a Champions League final. 🙄 https://t.co/ZMrkwlVTPx
— Gary Lineker (@GaryLineker) May 31, 2024
ئەم ئەستێرەی پێشووی بارسێلۆنا ئاماژەی بە گرێبەستی سێ ساڵەی دۆرتمۆند لەگەڵ کۆمپانیای رینمیتاڵ کە لە بواری بەرهەمهێنانی چەک کار دەکەن کردووە. واپێدەچێت لینکەر دژی هاتنی کۆمپانیاکانی بواری چەک سازییە بۆ جیهانی تۆپی پێ.
کۆمپانیاکە کارگەیەکی نوێ لە باشووری ئەڵمانیا دروست دەکات بۆ بەرهەمهێنانی 200 هەزار هاوەن لە ساڵێکدا لە چوارچێوەی پلانەکانی ئەوروپا بۆ زیادکردنی بەرهەمهێنانی چەک لە دوای شەڕی نێوان رووسیا و ئۆکرانیا.
هاوکات هانس یواکیم فاتسکە جێگری سەرۆکی یانەی دۆرتمۆند دڵخۆشی خۆی بەم هاوکارییە دەربڕی و بە لەبەرچاوگرتنی دۆخی ئەوروپا و هاوتەریب لەگەڵ بەرگریکردن لە ئازادی لە ئەڵمانیا پاڵپشتی بڕیارەکەی دۆرتمۆندی کرد.
