یاریگا –
گەرچی ئارسێناڵ بەراورد بە مانچێستەر سیتی هیوای بۆ پاڵەوانبوون کەمترە، بەڵام یانە لەندەنییەکە هەموو ئامادەکارییەکی کردووە بۆ ئەوەی ئەمڕۆ نازناوی پرێمەرلیگ بەرز بکاتەوە.
لە سۆشیاڵ میدیا گرتەیەکی ڤیدیۆیی بڵاوبووەتەوە، دوێنێ شەممە لە یاریگای ئیماراتس لە لەندەن پرۆڤە و ئامادەکاریی کراوە بۆ ئەوەی ئەگەر ئارسێناڵ ئەمڕۆ بووە پاڵەوانی پرێمەرلیگ، رێوڕەسم و ئاهەنگی بەدەستهێنانی نازناوەکە بەڕێوە بچێت.
— الدوري الانجليزي² (@VPLTrend) May 18, 2024
لە یاریگای ئیماراتس ئامادەکاریی تەواو کراوە بۆ ئەوەی ئارسێناڵ ببێتە پاڵەوانی خولەکە، تەنانەت جامی پرێمەرلیگیش دانراوە و کۆپییەکی جامەکە ئەمڕۆ لە یاریگاکە دەبێت، بۆ ئەوەی ئەگەر گەنەرز ببێتە پاڵەوان راستەوخۆ دوای یارییەکە رێوڕەسمی پاڵەوانبوونی گەنەرز بەڕێوە بچێت.
ئارسێناڵ هەموو ئامادەکارییەکی کردووە بۆ ئەوەی ببێتە پاڵەوانی خولەکە کە لەوەتەی وەرزی 2003/2004 ئەو نازناوەی بەدەست نەهێناوە، تەنانەت لە لەندەن بانەری پاڵەوانبوونی ئارسێناڵیش لەناو یاریگای ئیماراتس دیزاین کراوە و دانراوە.
ئەمڕۆ ئێوارە مانچێستەر سیتی پێشەنگی پرێمەرلیگ کاتژمێر 18:00 لە یاریگای ئیتیحاد میوانداریی وێستهام یونایتد دەکات و لە هەمان کاتیشدا ئارسێناڵ لە یاریگای خۆی میوانداریی ئێڤەرتن دەکات، ئارسێناڵ بۆ ئەوەی ببێتە پاڵەوان، دەبێت لە ئێڤەرتن بباتەوە و چاوەڕێی دۆڕان یان یەکسانبوونی مان سیتی بکات.
