یاریگا –
تێباس لە دیمانەیەکی لەگەڵ رۆژنامەی Oléـی ئارجێنتینی دەڵێت ‘ریال مەدرید لە چامپیۆنزلیگ بەهێزی لالیگا پیشان دەدات و خۆزگە مۆرینیۆ دەگەڕێتەوە لالیگا’.
خاڤیێر تیباس، سەرۆکی کۆمەڵەی لالیگا لە دیمانەیەکی لەگەڵ رۆژنامەی Oléـی ئارجێنتینی لەبارەی کێبڕکێکانی لالیگا دوای رۆیشتنی کریستیانۆ رۆناڵدۆ و لیۆنێل مێسی دەڵێت :’پاریس سانجێرمان هەریەکە لە مێسی و نێیمار و ئێمباپێی بردە ریزەکانی، کەچی خولی فڕەنسی نەگەیشتە لوتکە و ئاستی خولەکە بەرز نەبووەوە، کەچی لالیگا سەرەڕای رۆیشتنی کریستیانۆ و مێسی دانەبەزی، بەڵکو تۆزێک بەرزتریش بووینەوە، زۆر گرنگە بزانین کێبڕکێی نێوان یانەکان زۆر لە یاریزانەکان و راهێنەرەکان گرنگترە’.
🗣️ Tebas con Olé: de Messi y Mbappé a la AFA, las SAD y los millones de la Liga
✍️ Por Vicente Mugliahttps://t.co/FfWPQFyLTB
— Diario Olé (@DiarioOle) May 14, 2024
تیباس لە وەڵامی ئەوەی حەز دەکات چ یاریزانێک یان راهێنەرێک لە داهاتوودا بگەڕێتەوە لالیگا، دەڵێت :’خۆزگە دەخوازم خۆزێ مۆرینیۆ بگەڕێتەوە لالیگا، چونکە وەکو کەسایەتییەکی وەرزشی زۆر نایاب و بڕواپێنەکراوە، کۆنگرە رۆژنامەوانییەکانی هەمیشە وەکو شانۆیەک وابوو، یارییەکان لەگەڵ ئەو بەچێژتر بوون’.
لەبارەی ئاستی ریال مەدرید لە چامپیۆنزلیگ و ریمۆنتاداکانی دەڵێت :’ریال مەدرید ساڵانێکی زۆرە هەروایە، لەوانەیە گوێتان لێ بووبێت پێشتر لە جامی ئەوروپاش لە یاریی چوون 2-0 دەدۆڕا و لە یاریی گەڕانەوە لە سانتیاگۆ بێرنابیۆ 3-0 دەیبردەوە و ریمۆنتادای دەکرد، ئەوەی ریال مەدرید دەیکات بەهێزی لالیگا پیشان دەدات، سەرەڕای ئەوەی کریستیانۆ رۆناڵدۆ چووە یۆڤێنتۆس، کەچی سێریا ئەی لاوازتر بوو لەجیاتی ئەوەی بەهێزتر بێت’.
تیباس لەبارەی گواستنەوەی کیلیان ئێمباپێ بۆ ریال مەدرید دەڵێت :’ئێمباپێ وەرزی داهاتوو لە ریال مەدرید یاریی دەکات، ئەو یەکێکە لە باشترین یاریزانەکانی جیهان، بێڵینگهام و ڤینیسیۆسیش لە ریال مەدرید یاریی دەکەن و یانەکە تیپێکی بەهێزی هەیە، بەڵام هەموو ئەمانە گەرەنتی بەدەستهێنانی نازناوەکان ناکەن’.
