دوو ساڵ لەمەوبەر چی لە نێوان ئێمباپێ و پێرێز روویدا؟
یاریگا –
دوو ساڵ لەمەوبەر خەریکبوو هەموو شتێک لە نێوان ئێمباپێ و پێرێز تێکبچێت، بەڵام بە دانپێدانانێکی هێرشبەرە فڕەنسییەکە سەرۆکی یانەی ریال مەدرید ئاشتبووەوە و خەریکە خەونە لەمێژینەکەی دەهێنێتە دی.
تۆڕی وەرزشی ریلیڤۆی ئیسپانی ئاشکرایکردووە، هاوینی 2022 کیلیان ئێمباپێ بەڵێنی بە فلۆرێنتینۆ پێرێز سەرۆکی یانەی ریال مەدرید دابوو پەیوەندی بە یانە مەدریدییەکە بکات، بەڵام لەناکاو لەژێر فشاری سیاسی و دیبلۆماسی لە بڕیارەکەشی پەشیمان بووەوە و گریىەستەکەی بۆ ماوەی دوو ساڵ نوێکردەوە و بڕیاریدا لە پاریس سانجێرمان بمێنێتەوە.
تۆڕە ئیسپانییەکە رایگەیاندووە، ئێمباپێ دوای چەند رۆژێک هەستی کردبوو بڕیارێکی هەڵەی داوە و لە نوێکردنەوەی گرێبەستەکەی پەشیمان ببووەوە، پەیوەندی بە پێرێز کردبوو پێی راگەیاندبوو پەشیمانە گرێبەستەکەی نوێکردووەتەوە.
بەگوێرەی زانیارییەکانی میدیا ئیسپانییەکان، دەمێکە پێرێز و ئێمباپێ گەیشتوونەتە رێککەوتن، هەربۆیە پێش دەستپێکی ئەم وەرزە پێرێز بە خۆسیێ ئانخێل سانچێز بەڕێوەبەری وەرزشی و کالرۆ ئەنچیلۆتی راهێنەری ریال مەدرید راگەیاندبوو لە بازاڕی گواستنەوەی هاوینە تەنیا جود بێڵینگهام دەگوازنەوە و خۆیان بۆ پلانی ئێمباپێ 2024 ئامادە دەکەن، هەربۆیە لۆس بلانکۆس خۆسێلۆی بە خواستن بۆ ماوەی وەرزێک بردە ریزەکانی و ئامادە نەبوو هێرشبەری دیکەی سەرەڕم بگوازێتەوە یانەکەی.
ئێمباپێ بەفەرمی لە پەیامێکی ڤیدیۆییدا رۆیشتنی لە پاریس سانجێرمان راگەیاندووە و پێشبینی دەکرێت دوای یاریی کۆتایی چامپیۆنزلیگ بەفەرمی گرێبەستەکەی لەگەڵ ریال مەدرید رابگەیەنرێت کە ساڵانێکی زۆرە هاندەرانی یانە ئیسپانییەکە چاوەڕێی دەکەن.
