یەکشەممە ئێمباپێ ماڵئاوایی لە پاریس دەکات

یاریگا –

رۆژی یەکشەممە کیلیان ئێمباپێ ماڵئاوایی لە پاریس سانجێرمان دەکات.

رۆژنامەی لیکیپی فەڕەنسی بڵاویکردووەتەوە، رۆژی یەکشەممەی داهاتوو، کیلیان ئێمباپێ لە یاریگای پارک دێ پرێنسیس ماڵئاوایی لە پاریس سانجێرمان و هاندەرانی یانەکە دەکات.

ئەستێرە فەڕەنسییەکە لە هاوینی داهاتوو گرێبەستەکەی لەگەڵ سانجێرمان کۆتایی دێت، بەگوێرەی میدیا باوەڕپێکراوەکان، کیلیان لەگەڵ ریال مەدرید گەیشتووەتە رێککەوتن و هاوینی داهاتوو پەیوەندی بە یانە ئیسپانییەکە دەکات.

رۆژی یەکشەممە لە یارییەکانی گەڕی 33ـی خولی فەڕەنسی، پاریس سانجێرمان لە یاریگای خۆی میوانداری تۆڵوز دەکات، ئەو یارییەش کۆتا یاری پاریسە لە یاریگای خۆی لەم وەرزەی خولەکەدا.

بۆیە یارییەکەی تۆڵۆز دەبێت بە کۆتا یاری کیلیان ئێمباپێ لە یاریگای پارک دێ پرێنسیس بە درێسی سانجێرمان.

ئێمباپێ لە هاوینی 2018 بەبڕی 180 ملیۆن یۆرۆ لە مۆناکۆی فەڕەنسییەوە پەیوەندی بە پاریس کرد، بە درێسی یانەکەی ئێستای لە سەرجەم پاڵەوانێتییەکاندا 306 یاری کردووە، 255 گۆڵی کردووە و 108 گۆڵیشی درووستکردووە.