بەهۆکارێکی سەیر یاریزانێکی دۆرتموند بەرەو پاریس گەشتی نەکردووە
قوتابخانە لە چامپیۆنزلیگ گرنگترە
یاریگا –
یاریزانێکی بۆڕووسیا دۆرتموند بەهۆی تاقیکردنەوەی قوتابخانە، بەرەو پاریس گەشتی نەکردووە.
سبەی سێشەممە، لە یاری گەڕانەوەی قۆناخی پێشکۆتایی چامپیۆنزلیگ، بۆڕووسیا دۆرتموند لە یاریگای پارک دۆ پرێنس دەبێتە میوانی پاریس سانجێرمان.
رۆژنامەی بیڵدی ئەڵمانی بڵاویکردووەتەوە، کیێل ئارک فاتجنی تەمەن 18 ساڵان لەگەڵ شاندی دۆرتموند بەرەو پاریس گەشتی نەکردووە، چوونکە یاریزانەکە سبەی لە قوتابخانە تاقیکردنەوەی هەیە.
ℹ️ Kjell Wätjen wird morgen nach seiner Abiturprüfung nachreisen. Viel Erfolg, Kjell! 🍀
— Borussia Dortmund (@BVB) May 6, 2024
هاوکات، هەژماری فەرمی یانە ئەڵمانیەکە لە لە پلاتفۆڕمی ئێکس بڵاویکردووەتەوە، کیێل سبەی پاش تاقیکردنەوەکان بە فڕۆکەیەکی تایبەت بەرەو پاریس گەشت دەکات و پەیوەندی بە شاندی یانەکە دەکات، لە تاقیکردنەوەکان هیوای بەختێکی باشی بۆ دەخوازین.
کیێل لەم وەرزە بە درێسی تیپی لاوان 31 یاری کردووە، 10 گۆڵی کردووە و 11 گۆڵی درووستکردووە، بە درێسی تیپی یەکەمیش لە بۆندسلیگا 1 یاری کردووە و 1 گۆڵیشی درووستکردووە.
زەردەواڵەکان لە یاری چوون لە یاریگای سیگناڵ ئیدونا پارک 1-0 شکستیان بە یانە فەڕەنسییەکە هێنا، ئامانجیانە پارێزگاری لەو ئەنجامە بکەن و خۆیان بگەیەننە یاری کۆتایی.
