یاریگا –
ئێرلینگ هالاند، ئەستێرەی مانچێستەرسیتی و هەڵبژاردەی نەرویج، بڕیارە بەم نزیکانە، لە رۆڵی پاشای بەربەرەکاندا لە یارییە بەناوبانگەکەی Clash of Clans (شەڕی هۆزەکان) دەربکەوێت.
هالاند، بڕیارە ببێتە کارەکتەری یاریی ڤیدیۆیی Clash of Clans، کە ئەمە یەکەمجارە کەسایەتیەکی راستەقینە بۆ ئەم یارییە زیاد بکرێت. ئەستێرە نەرویجییەکە بڕیارە لەم یارییە لە رۆڵی پاشای بەربەرییەکان لە رووداوێکی یاری وەرزیدا کە لەسەر تەوەرەی تۆپی پێیە دەربکەوێت.
لە دوای ئەم هەواڵە روون بووەوە کە مەبەستی لە بڵاوکردنەوەی وێنەکەی بە سمێڵەوە لە ستۆری ئینستاگرامەکەی چی بووە.
یاریزانانی یارییە بەناوبانگەکەی Clash of Clans دەتوانن داگیرکەرێکی نەرویجی وەربگرن یان هێرش بکەنە سەر گوندەکەی و وێرانی بکەن. ئەگەر هاندەری مانچێستەر یونایتد یان ئارسناڵ بن، ئەمە باشترین دەرفەتە بۆ تۆڵەسەندنەوە لە هاڵاند!
هالاند کە زیاتر لە 10 ساڵە یاری Clash of Clans دەکات کە کۆمپانیای Supercell گەشەپێدەری یارییە فینلەندییەکەیە، پەیوەندی بە کۆمپانیاکە کردوەە و پێشنیاری هاوکاری پێکردوون و کۆمپانیاکەش ئەم هەلەی قۆستووەتەوە لەگەڵ ڤایکینگە نەرویجییەکە رێک کەوتوون.
وەرزی رابردوو هالاند لە پرێمەرلیگ توانی ریکۆردی زۆرترین گۆڵ لەیەکەم وەرزی دەرکەوتن لەم خولە بشکێنێت، دواتریش لەگەڵ سیتی سێیانەی مێژوویی بەدەست هێنا. ئێستا جارێکی تر مێژوو دەنوسێتەوە بە بوون بە یەکەم کاراکتەری راستەقینە کە لە ڤیدیۆ گەیمی Clash of Clans دەربکەوێت.
هێرشبەرە تەمەن 23 ساڵەکە لەم وەرزەدا 32 گۆڵی تۆمارکردووە، هاندەرێکی کۆنی ئەم یارییەیە، کە زیاتر لە دوو ملیار جار دابەزێنراوە. تەنانەت گوندێکی سەرنجڕاکێشی لەناو یارییەکەدا هەیە کە بووە هۆی ئەم هاوکارییە.
From the pitch to the battlefield! I’m the new Barbarian King in @clashofclans #ClashwithHaaland pic.twitter.com/6O9QacpnOi
— Erling Haaland (@ErlingHaaland) April 30, 2024
لە گرتەیەکی ڤیدیۆییدا کە لەلایەن کۆمپانیای سوپەرسێڵەوە بڵاوکراوەتەوە، لەشکرێکی بەربەری، دوای ئەوەی نەیانتوانی هێرش بکەنە سەر گوندێک، لەناکاو پارچە رۆژنامەیەک دەدۆزنەوە کە وێنەی هالاندی لەسەرە،بە مانشێتێکی گەورەوە بە گەورەترین هێرشبەری جیهان ناودەبرێت.
ستوارت مەکگی بەڕێوەبەری گشتی کۆمپانیای کلاش ئۆف کلانس دەڵێت:
کاتێک بیستمان ئێرلینگ هالاند هاندەری یارییەکەمانە و دەیەوێت هاوبەشیمان لەگەڵ بکات، بەڕاستی بیرۆکەیەکی خەیاڵی بوو.
هالاندیش سەبارەت بەم یارییە دەڵێت:
ماوەیەکی زۆرە هاندەری گەورەی یارییەکەم و هەموو شتێک لەبارەی یارییەکەوە دەزانم، بۆیە بەڕاستی زۆر نایاب و سەرنجڕاکێشە کە وەک کارەکتەری ناو یارییەکە دەربکەوم.
وەرزی تایبەتی هالاند سبەی دەستپێدەکات و تا 31ی ئایار بەردەوام دەبێت، ئەگەر لە بەرەکانی شەڕدا شکست بە هالاند بهێنیت، پاداشتی زیادە بەدەست دەهێنیت.
