کاتی تیروپشکی چامپیۆنزلیگ و خشتەی تەواوی یارییەکانی ئەم وەرزە
یاریگا –
رۆژی هەینی تیروپشکی یارییەکانی قۆناخەکانی داهاتووی چامپیۆنزلیگ رادەکێشرێت و خشتە و کاتی تەواوی یارییەکانی ئەم وەرزە ئاشکرا دەبن.
رۆژی هەینی 15ـی مارس/ئاداری 2024 کاتژمێر 02:00ـی دوای نیوەرۆ (بە کاتی هەولێر) تیروپشکی قۆناخەکانی چارەکی کۆتایی و پێش کۆتایی و یاریی کۆتایی ئەم وەرزەی چامپیۆنزلیگ رادەکێشرێت، کە یانەکانی ریال مەدرید، بایرن میونشن، مانچێستەر سیتی و پاریس سانجێرمان گەیشتوونەتە قۆناخی چارەکی کۆتایی و رۆژانی سێشەممە و چوارشەممە ناسنامەی چوار یانەکەی دیکەش ئاشکرا دەبێت.
یاسای تیروپشکەکانی چارەکی کۆتایی و پێش کۆتایی
رۆژی هەینی جگە لە چارەکی کۆتایی تیروپشکی قۆناخی پێش کۆتایی و یاریی کۆتاییش رادەکێشرێت، بەگوێرەی یاسای پاڵەوانێتییەکە یانەکان دەتوانن بەر یەکتری بکەون، هەر یانەیەک سەرەتا ناوی رابکێشرێت ئەوا لە قۆناخی چارەکی کۆتایی یاریی گەڕانەوە لە دەرەوەی یاریگای خۆی دەبێت و یاریی چوون لە یاریگای ئەو دەبێت.
جگە لە چارەکی کۆتایی، تیروپشکی قۆناخی پێش کۆتایی و یاریی کۆتاییش رادەکێشرێت، تیروپشکی براوەی یارییەکانی چارەکی کۆتاییش رادەکێشرێت و تیروپشک بۆ یاریی کۆتاییش دەکرێت بۆ ئەوەی یەکلا بێتەوە کامە یانە وەکو خاوەن ماڵ و میدواندار لە یاریی کۆتایی هەڵسوکەوت دەکات.
خشتەی یارییەکانی قۆناخەکانی داهاتوو
یارییەکانی چوونی قۆناخی چارەکی کۆتایی رۆژانی 9 و 10ـی ئەپرێل/نیسان دەکرێن، یارییەکانی گەڕانەوەی قۆناخەکەش رۆژانی 16 و 17ـی هەمان مانگ دەکرێن.
یارییەکانی چوونی قۆناخی پێش کۆتایی رۆژانی 30ـی ئەپرێل/نیسان و 1ـی مایۆ/ئایار دەکرێن، یارییەکانی گەڕانەوەش رۆژانی 7 و 8ـی مایۆ/ئایار دەکرێن، یاریی کۆتاییش رۆژی 1ـی یۆنیۆ/حوزەیران لە یاریگای وێمبلی لە لەندەن دەکرێت.
