هۆشدارییەک بۆ ریال مەدرید؛ بیرتانە ئێمباپێ و مێسی و نێیمار چۆن پاریسیان وێران کرد؟
یاریگا –
یاریزانێکی لالیگا هۆشدارییەک دەداتە ریال مەدرید و لەبارەی چوونی ئێمباپێ بۆ یانە ئیسپانییەکە دەڵێت ‘بیرتانە ئێمباپێ و مێسی و نێیمار چۆن پاریسیان وێران کرد؟’.
یاگۆ ئاسپاس هێرشبەری سێلتاڤیگۆی ئیسپانی لەبارەی ئەگەری چوونی کیلیان ئێمباپێ بۆ ریال مەدرید دەڵێت :’پەیوەندیکردنی ئێمباپێ بە ریزەکانی ریال مەدرید لە رووی ئابوورییەوە بۆ لالیگا بەسوود دەبێت، بەڵام پێویستە هەمووان بەشداریی کێکەکە بکەن بۆ ئەوەی یانەکانی دیکەش بتوانن لە مێرەنگی نزیک ببنەوە’.
ئاسپاس دەشڵێت :’لەسەر کاخەز شتێکی سرووشتییە هەموومان بڵێین ریال مەدرید لەگەڵ ئێمباپێ هەموو شتێک تێک دەشکێنێت، بەڵام پێویستە ئەمە لە واقیعدا رووبدات، کاتێک مێسی و ئێمباپێ و نێیمار بەیەکەوە لە پاریس سانجێرمان بوون، گوتیان تەواو پاریس سانجێرمان بووە بۆمب، کەچی نەیانتوانی هیچ وەرزێک نازناوی چامپیۆنزلیگ ببەنەوە’.
کارلۆ ئەنچیلۆتی راهێنەری ریال مەدرید لە کۆنگرەی رۆژنامەوانی پێش یارییەکەیان بەرامبەر سێلتاڤیگۆ کە وابڕیارە ئەمشەو لە لالیگا بەیەک بگەن، لەبارەی قسەکانی ئاسپاس گوتی :’بەهیچ شێوەیەک لە قسەکانی ئاسپاس تێنەگەیشتم’.
چاوەڕوان دەکرێت هاوینی داهاتوو ئێمباپێ بچێتە ریزەکانی ریال مەدرید و لە پاڵ هەریەکە لە جود بێڵینگهام و ڤینیسیۆس جۆنیۆر یاریی بکات، کە ئەم وەرزە تا ئێستا ریال مەدرید لە لالیگا 56 گۆڵی کردووە و بێڵینگهام گۆڵکاری یانەکەیە بە 16 گۆڵ.
پاریس سانجێرمان هاوینی 2021 دوای گواستنەوەی لیۆنێل مێسی بۆ ریزەکانی، بووە خاوەنی سێکوچکەی ئێمباپێ و نێیمار و مێسی کەچی ئەو سێ ئەستێرەیە نەیانتوانی نازناوی چامپیۆنزلیگ بۆ یانەکە بەدەست بهێنن، مێسی و نێیمار ریزەکانی یانەکەیان بەجێهێشت و ئێمباپێش نزیکە لە یانەکە بڕوات.
