گواردیۆلا: ئێستا بەراورد بەو کاتانەی لە بارسێلۆنا بووم چامپیۆنزلیگ زەحمەتترە

یاریگا –

گواردیۆلا پێش یارییەکەی کۆپێنهاگن دان بە سەختی و قورسی چامپیۆنزلیگ دادەنێت، بەڵام دەڵێت هێشتا دەیانەوێت نازناوەکە ببەنەوە.

پێپ گواردیۆلا، بەڕێوەبەری هونەری مانچێستەر سیتی پێش یارییەکەیان بەرامبەر کۆپێنهاگن لە چامپیۆنزلیگ دەڵێت :’راستە ئێمە وەرزی رابردوو نازناوی چامپیۆنزلیگمان بەدەستهێنا، بەڵام ئێمە سەرەڕای رێزێکی زۆرم بۆ کۆپێنهاگن بەڵام دەمانەوێت بگەینە چارەکی کۆتایی و قۆناخەکان بەدوای یەکدا تێبپەڕێنین، ئێمە دەمانەوێت سبەی بردنەوە بەدەست بهێنین، بیر لە هیچ شتێکی دیکە ناکەینەوە، وەرزی رابردووش سیانەمان بەدەستهێنا بەبێ ئەوەی قسەی لەسەر بکەین’.

هەروەها گواردیۆلا دەشڵێت :’ئێستا بەراورد بە پێشتر چامپیۆنزلیگ زۆر بەهێزتر و سەختتر بووە، بەراورد بەو کاتەی لە بارسێلۆنا بووم، ئێستا راهێنەری باشتر و یانەی باشتر لە چامپیۆنزلیگ هەن، لە چامپیۆنزلیگ ئێستا گەیشتن بە قۆناخی پێش کۆتایی زۆر قورس بووە، پێویستە زۆر بە باشی بۆ ئەم پاڵەوانێتییە ئامادەبین، چونکە شایستەی ئەوەیە’.