یاریگا –
وادیارە وەرزی داهاتوو، گۆڕانکاری گەورە بەسەر خولی فەرەنسیدا دێت، جیا لە یەکلاییبوونەوەی چیرۆکی گواستنەوەی کیلیان ئێمباپێ، ناوی خولەکەش دەگۆڕدرێت.
رادیۆی مۆنتی کارلۆ بڵاویکردووەتەوە، خولی فەرەنسی لە ناوی لیگ وەن ئوبەر ئیتس، دەکرێتە لیگ وەن مەکدۆناڵدز و بەهای گرێبەستی ساڵانەی نێوانیان دەگاتە 17 ملیۆن پاوەند.
یوبەر ئیتس لە وەرزی 2020-2021 بووە سپۆنسەری خولی فەرەنسی و گرێبەستی دوو ساڵی یەکەمیان 12.8 ملیۆن پاوەند بوو، بەڵام لەم وەرزەدا بەهای گرێبەستەکە بۆ 14.5 ملیۆن پاوەند بەرزکراوەتەوە.
لە دوای بڵاوبوونەوەی پەتای کۆرۆنا، خولی فەرەنسی بۆ خۆدەربازکردن لە سەختی دۆخی دارایی، پەنای بردە بەر پەیداکردنی سپۆنسەر بۆ خولەکە.
لە ساڵی 2018، کۆمپانیای میدیا پڕۆ بە بڕی 700 ملیۆن پاوەند/ساڵانە مافی گواستنەوەی یارییەکانی کڕییەوە، ساڵێک دوای گرێبەستەکە، بەهۆی قەیرانی داراییەوە، کۆمپانیا ئیسپانییەکە نەیتوانی شایستە داراییەکان بدات و خولی فەرەنسی مافی سپۆنسەرییەکەی دووبارە فرۆشتەوە.
