کین توڕەیە لە ماچکردن و باوەشی یاریزانانی مانچستەریونایتد و لیڤەرپوول
یاریگا-رۆی کین ئەستێرە مێژوویی یانەی مانچێستەر یونایتد هێرشدەکاتە سەر یاریزانانی یانەکەی بەهۆی ئەوەی بەر لە یارییەکەی لیڤەرپوول لەگەڵ یاریزانێکی لیڤەرپوول یەکتریان ماچکردووە و پێکەنیون.
دوێنێ لە یارییەکی بەهێزدا لە نێوان دوو یانە رکابەرە مێژووییەکەی ئینگلتەرادا هەردوولا بە گۆڵێک یەکسان بوون، بەر لە دەستپێک و لە کاتی هاتنە ناوەوەی یاریزانان ئەندریەس پێرێرا و فرێد بینران لەگەڵ فێرمینیۆی هاونیشتیمانیان لە تیمی بەرامبەر کە چاویان بەیەک کەوت یەکتریان ماچکرد و باوەشیان بەیەکدا کرد.
کین بۆ سکای سپۆر وتی “ئەو دیمەنە وای لێکردم بێزم لە خۆم بێتەوە، ئەوان دەچن بۆ جەنگ کەچی ماچ دەکەن و یەک باوەش دەکەن. تەنانەت نابیت سەیری یاریزانانی تیمی بەرامبەر بکەیت و وا خۆت ئامادە بکەیت لە جەنگدایت. رکابەری نێوان ئەو دوو یانەیە هەر ماوە بەڵام یاریزانەکان گۆڕاون . دەتوانیت دوای یارییەکە قسەیان لەگەڵ بکەیت یاخود دوای یارییەکەش قسەیان لەگەڵ مەکە!”.
بەو ئەنجامە زنجیرە سەرکەوتنەکانی لیڤەرپوول راگیرا بەڵام هەر بێ رکابەر لە پلەی یەکەمدایە و یونایتدیش لە پلەی ١٣هەمدایە.
