بڕوابکەی یان نا، ئەنچیلۆتی ئێمباپێی ‘بێ بەڵێن’ـی ناوێت
یاریگا –
لەکاتێکدا ئێمباپێ دوایین رۆژەکانی لە پاریس سانجێرمان بەڕێدەکات و هاوینی داهاتوو ریزەکانی یانەکە بەجێدەهێڵێت، کارلۆ ئەنچیلۆتی لەو یاریزانە تووڕەیە و لە ریال مەدرید نایەوێت.
ماڵپەڕی ریلیڤۆی ئیسپانی ئاشکرایکردووە، هاوینی رابردوو کارلۆ ئەنچیلۆتی داوای لە بەرپرسانی ریال مەدرید کردووە بابەتی گواستنەوەی کیلیان ئێمباپێ دابخەن و چیدیکە هەوڵی گواستنەوەی ئەو هێرشبەرە فەرەنسییە نەدەن، چونکە هاوینی 2022 بەڵێنی خۆی شکاند و لە پاریس مایەوە.
بەگوێرەی ماڵپەڕە ئیسپانییەکە، ئەنچیلۆتی لە بێ بەڵێنییەکەی ئێمباپێ نیگەرانە و داوای لە یانە مەدریدییەکە کردبوو لەجیاتی ئێمباپێ هەوڵی گواستنەوەی هاری کەین بدەن بۆ ئەوەی شوێنی کەریم بێنزێما پڕ بکاتەوە.
سەرەڕای هەوڵەکانی ئەنچیلۆتی، بەڵام فلۆرێنتینۆ پێرێز هاوینی رابردوو رەتیکردبووەوە پارەیەکی زۆر بە هێرشبەرێکی سەرەڕم بدات و هێشتا هیوای لەسەر گواستنەوەی ئێمباپێ هەڵچنیبوو.
بەگوێرەی سەرچاوەکانی ماڵپەڕی ریلیڤۆ، ئێمباپێ بە یاریزانەکانی پاریس سانجێرمانی راگەیاندووە ئەم وەرزە هەموو هەوڵێک دەدات نازناوی چامپیۆنزلیگ بۆ یانەکە بباتەوە، سەرەڕای ئەوەی بڕیاریداوە هاوینی داهاتوو یانەکە بەجێبهێڵێت بەڵام هەموو هەوڵێک دەدات یەکەم نازناوی چامپیۆنزلیگ بۆ یانەکە بباتەوە.
