سەرۆکی نەیجیریا شوقە و پارچە زەوی بەسەر یاریزانانی هەڵبژاردەی وڵاتەکەی دابەشکرد
یاریگا –
سەرۆکی نەیجیریا لە پاداشتی بەدەتسهێنانی پلەی دووەمی جامی ئەفریقا، پارچە زەوی و شوقەی بەسەر یاریزانانی هەڵبژاردەکەی دابەشکرد.
دوای گەڕانەوەیان لە جامی ئەفریقا و گەیشتنیان بە یاریی کۆتایی پاڵەوانێتییەکە و بەدەستهێنانی مێداڵیای زیو، بۆلا ئەحمەد تینوبو سەرۆکی نەیجیریا لە کۆشکی سەرۆکایەتی پێشوازیی لە یاریزانانی هەڵبژاردەکەیان کرد و بڕیاریدا لە ئابوجا پایتەختی نەیجیریا پارچە زەویەک و شوقەیەک بە هەر یاریزانێکی هەڵبژاردەکە بدات.
— Presidency Nigeria (@NGRPresident) February 13, 2024
سەرۆکی کۆماری نەیجیریا لەکاتی پێشوازیکردنی لە یاریزانانی هەڵبژاردەی وڵاتەکەی، مێداڵیای شانازیی وڵاتەکەی بە یاریزانەکان بەخشی و ستایشی ئەو ئاستەی کردن کە لە جامی ئەفریقا پێشکەشیان کرد.
نەیجیریا لە یاریی کۆتایی جامی ئەفریقا 2-1 بە کۆتدیڤوار میوانداری پاڵەوانێتییەکە دۆڕا، کە لەوەتەی ساڵی 2013 یەکەمجاربوو نەیجیریا بگاتە یاریی کۆتایی.
سەرۆکی کۆتدیڤواریش وەکو پاداشتێکی بۆ بەدەستهێنانی جامی ئەفریقا بڕیاریدا 75 هەزار یۆرۆ و ڤێلایەک بە هەر یاریزانێکی هەڵبژاردەی وڵاتەکەی ببەخشێت.
