ئاسۆ رۆستەم ریزەکانی یانەی هەولێری جێهێشت

یاریگا –

ئاسۆ رۆستەم، دوای بایکۆت کردنی مەشقەکانی یانەی هەولێر بۆ ماوەی دوو رۆژ، ئەمڕۆ بە رەزامەندی هەردوولا، گرێبەستەکەی هەڵوەشاندەوە.

ئاسۆ رۆستەم، دوێنێ شەممە (27ی یەنایەر/کانوونی دووەم) چوو بووە پاڵ چوار یاریزانەکەی دیکەی یانەی هەولێر، کە بەهۆی دواکەوتنی پێشەکی گرێبەستەکەی دوو رۆژە بایکۆتی مەشق و راهێنانەکانی یانەکەی قەڵاومنارەی کرد.

بەگوێرەی بەدواداچوونی تۆڕی وەرزشی یاریگا، پێشەکی گرێبەستی ئەو یاریزانەی بایکۆتی مەشق و راهێنانەکانی یانەی هەولێریان کردووە دەگاتە 325 ملیۆن دینار، کە ئاسۆ رۆستەم هاوینی رابردوو لە یانەی شوڕتەوە بە خواستن گەڕابووەوە ریزەکانی یانەی هەولێر و ئەمڕۆش جێهێشت.

تەنیا پێشەکی گرێبەستی شێرکۆ کەریم (150 ملیۆن دینار)، ئاسۆ رۆستەم (75 ملیۆن دینار)، عەلی شاخەوان (40 ملیۆن دینار)، محەمەد موحسین (40 ملیۆن دینار) و حوسێن جولی (20 ملیۆن دینار) بریتییە لە 325 ملیۆن دینار، کە چوار یاریزان جگە لە ئاسۆ رۆستەم (یانەکەی جێهێشت) ئامادە نین تاوەکو پێشەکی گرێبەستەکانیان پێنەدرێت ناگەڕێنەوە راهێنانەکان.