ریال مەدرید لە گواستنەوەی دەیڤز نزیک بووەتەوە
یاریگا –
یانەی ریال مەدرید نزیکە لە بەدەستهێنانی تواناکانی ئالفۆنسۆ دەیڤزی کانەدی.
رۆژنامەنووسی نزیک لە بایرن میونشن، کریستیان فاڵک بڵاویکردووەتەوە، خەریکە بایرن میونشن یەکێکی دیکە لە ئەستێرەکانی لە بەرژەوەندی ریال مەدرید لەدەست دەدات، کە ئەویش ئالفۆنسۆ دەیڤزی کانەدییە.
دەیڤز بە ئاشکرا ئارەزووی خۆی بۆ پەیوەندیکردن بە ریال مەدرید دەربڕییوە. گفتوگۆی نوێکردنەوەی گرێبەستەکەشی لەگەڵ بایرن وەستاوە و پێشبینی ناکرێت نوێی بکاتەوە.
Bayern Munich could now lose another star man to Real Madrid https://t.co/YkmywcORZF
— Christian Falk (@cfbayern) January 12, 2024
بەپێی هەواڵێکی ماڵپەڕی رێلێڤۆ، کارگێڕی ریال مەدید و تەنانەت ژووری خۆگۆڕینیش دڵنیان لەوەی بەرگریکارەکەی میونشن پەیوەندی بە یانە شاهانەکەی ئیسپانیا دەکات، متمانەی تەواویان بەخۆیان هەیە.
گرێبەستی یاریزانە تەمەن 22 ساڵانییەکە لە هاوینی 2025 لەگەڵ بایرن کۆتایی دێت، مەدریدییەکان دەیانەوێت هاوشێوەی گواستنەوەی تۆنی کروس، ئۆفەرێک پێشکەش بە بایرن بکەن، کە نرخێکی کەمتر لەخۆ بگرێت لەچاو نرخی دیاریکراوی یاریزانەکە.
چوونکە ئەگەر بایرن ئامادە نەبێت بەو نرخە دەستبەرداری ببێت ئەوا هاوشێوەی دەیڤد ئالابا، ناچار دەبێت لە هاوینی 2025 بەبێ بەرامبەر دەستبەرداری دەیڤزیش ببێت.
دەیڤز لە هاوینی 2019 بەبڕی 14 ملیۆن یۆرۆ، لە ڤانکۆڤەری ئەمریکییەوە گواسترایەوە بۆ بایرن، بە درێسی یانە ئەڵمانییەکە لە سەرجەم پاڵەوانێتییەکان 176 یاری کردووە، 8 گۆڵی کردووە و 28 گۆڵیشی درووستکردووە.
بەدرێسی باڤارییەکان 1 نازناوی چامپیۆنزلیگ، 5 نازناوی بۆندسلیگا، 1 نازناوی جامی جیهانی یانەکان، 1 نازناوی جامی سوپەری ئەوروپا، 2 نازناوی جامی ئەڵمانیا و 3 نازناوی جامی سوپەری ئەڵمانیای بەدەستهێناوە.
