بارسێلۆنا خرابترین یانەی ساڵی رابردوو بووە

یاریگا

یانەی بارسێلۆنای ئیسپانیا، سەرەڕای ئەوەی سەرەتای ئەم وەرزەی ئیسپانیای بە باشی دەست پێنەکردووە، لە هەمان کاتدا یەکێک لە خرابترین ئامارەکانی ئەم وەرزەی لەسەر ئاستی پێنج خولە گەورەکەی ئەوروپا تۆمار کردووە.

ماڵپەڕی WhoScored کە تایبەتە بە ئامار و شیکاری تۆپی پێی، باسی لە بارسێلۆنا کردووە وەک ئەو تیپە کە زۆرترین هەلی گۆڵکردنی لەدەست داوە. یانە کەتەلۆنیەکە لە نێو پێنج خولە گەورەکەی ئەوروپا، خرابترین ئاماری تۆمار کردووە، هەر ئەمەش وایکردووە بەشێک لە هاندەرەکانی بێ هیوا بن.

لە ئامارەکانی ئەو سەرچاوەیەدا دەردەکەوێت، تیپەکەی چاڤی هێرناندێز ساڵی 2023 بە رێژەی ٪95 دەرفەتەکانی گۆڵ کردنی لەدەستداوە و پێشەنگی ریزبەندی گرتووە.

بارسێلۆنا وەرزی رابردوو لە کۆی سەرجەم یارییەکانی لالیگا، تەنها 20 گۆڵی لێکرا و 70 گۆڵیشیان تۆمار کرد، کەچی ئەم وەرزە لە کۆی 18 یاریی 21 گۆڵیان لێکراوە و 34 گۆڵیان کردووە.

هەر ئەمەش وایکرد کارگێری بارسێلۆنا، شەش مانگ پرۆسەی گواستنەوەی ڤیکتۆر رۆکی، هێرشبەری لاوی بەڕازیلی پێش بخات.