یاریگا –
یانەی چێڵسی ئینگلیزی، بڕیارە بەم نزیکانە پەردە لەسەر دوا سپۆنسەری ئەم وەرزەی یانەکەی لابدات.
بە گوێرەی راپۆرتێکی رۆژنامەی ئەتلەتیک، یانەی چێڵسی بڕیارە لەگەڵ کۆمپانیای بینگ ئێکس کە ئاڵوگۆڕی دراوی کریپتۆیە گرێبەست واژوو بکات و ئەم کۆمپانیایە وەکوو سپۆنسەری نوێی یانە ئینگلیزیەکە دەردەکەوێت. لۆگۆی ئەم کۆمپانیایە لە وەرزی 2023-2024 لەسەر قۆڵی درێسی یانەکە دادەنرێت.
هەروەها ئەم رێکەوتنە رێگە بە دانانی لۆگۆی کۆمپانیاکە دەدات لەسەر پێشەوەی جلوبەرگی راهێنان و پێش یارییەکان بۆ وەرزی 2024-2025 کە لە مانگی ئابی ئەمساڵ دەست پێدەکات.
چێڵسی هیوادارە بەم زووانە گرێبەستەکە کۆتایی پێبهێنێت و لۆگۆی بینگ ئێکس بخاتە سەر درێسی یانەکە بۆ یاری بەرامبەر میدلزبڕۆ لە جامی کاراباو کە بڕیارە 9ی ئەم مانگە بەڕێوە بچێت.
BingX خزمەتگوزارییەکی ئاڵوگۆڕی دراوی کریپتۆیە و لە ساڵی 2018 لە سەنگافورە دەستیپێکردووە. خزمەتگوزارییەکە لە سەرانسەری جیهاندا خزمەت بە زیاتر لە 10 ملیۆن بەکارهێنەر دەکات و زیاتر لە 350 دراوی کریپتۆی جیاواز دەگرێتەوە کە بەکارهێنەران دەتوانن لە ئاڵوگۆڕەکەیاندا بکڕن و بیفرۆشن.
کۆمپانیاکە ئۆفیسەکانی لە ئەمریکا، کەنەدا، وڵاتانی یەکێتی ئەوروپا، هۆنگ کۆنگ، و تایوان هەیە، بەڵام ماڵپەڕ یان ئەپی BingX لە هەندێک وڵاتدا دەستناکەوێت، لەوانە ئەمریکا، چین و بەریتانیا.
