وادەی یەکەم بەشداری ئاردا گولەر

یاریگا –

ئاردا گولەر، شەوی چوارشەممە لە یاریگای سانتیاگۆ بێرنابیۆ بەرامبەر مایۆرکا یەکەم یاری خۆی لەگەڵ یانەی ریال مەدرید ئەنجام دەدات.

لە گواستنەوەی هاوینە و لە کێبڕکێی لەگەڵ یانەکانیتر بەتایبەت یانەی بارسێلۆنا، ریال مەدرید توانی گریبەست لەگەڵ گۆلەر واژوو بکات و بیگوازێتەوە بێرنابیۆ.

لە مەدرید هەمووان هیوایان دەخواست ئەم ئەستێرە تورکە زۆر بە زوویی بتوانێت جێگەی خۆی لە پێکهاتەی یانەکەیان دا بکاتەوە، زۆرێکیش لە یاریزانانی ریال لە مەشقەکان ستایشی بەهرە و لێهاتووییەکانی ئەویان دەکرد بۆ ئەوەی هیوای زیاتر بە هاندەران ببەخشن.

بەڵام دۆخەکە بەو شێوەیەی کە چاوەڕوان دەکرا نەڕۆیشت و بەهۆی پێکانە یەک لە دوای یەکەکان ئەم یاریزانە نەیتوانی یەک خولەکیش بۆ یانە مەدریەکە یاری بکات، تەنانەت کاتێک لەسەر کورسی یەدەگ بوو و پێدەچێت نزیک بێت لە پۆشینی درێسی ریال بەڵام پێکانێکی تر روویدا کە جارێکی دیکە وایکرد لە یاریگاکان دوور بکەوێتەوە.

بەڵام بە پێی هەواڵێکی رۆژنامەی مارکا چاوەڕوانییەکان خەریکە کۆتاییان دێت و ئێستا گولەر بۆ یاریکردن لەگەڵ ریال ئامادەیە. هەروەها رۆژنامەکە ئاماژەی بەوە کرد کە گولەر لە دوو مەشقی کۆتایی یانەی ریال بەبێ هیچ کێشەیەک راهێنانی کردووە و توانیویەتی گڵۆپی سەوز لە تیمی پزیشکی و تیمی توانای جەستەیی وەربگرێت.

ئێستا گەر شتێکی تایبەت روونەدات، گولەر شەوی چوارشەممە چەند خولەکێک بەرامبەر مایۆرکا یاری دەکات و دواتر بۆ قۆناغی 16ی جامی شای ئیسپانیا پشوو وەردەگرێت. یارییەکەی بەرامبەر ئاراندینا لە خولی پلە چوار سادە دەردەکەوێت، بەڵام ئەگەر ئاردا بەرامبەر مایۆرکا یاری بکات، وەک خۆپارێزییەک لە جامی شای ئیسپانیا پشووی پێدەدرێت.