مانچێستەر یونایتد 50 ملیۆن بۆ ئامانجەکەی ریال مەدرید تەرخان دەکات

یاریگا –

مانچێستەر یونایتد 50 ملیۆن یۆرۆ بۆ گواستنەوەی بەرگریکارێک تەرخان دەکات.

ماڵپەڕی Fichajes بڵاویکردووەتەوە، مانچێستەر یونایتدی ئینگلیزی بڕی 50 ملیۆن یۆرۆی بۆ گواستنەوەی جۆرجیۆ سکالڤینی ئیتاڵی و بەرگریکاری یانەی ئاتڵانتا تەرخانکردووە.

لەم وەرزە بەهۆی پێکانە یەک لەدوای یەکەکان و نەبوونی ژمارەیەک بەرگریکاری ئاستبەرزی پێویست، شەیتانە سوورەکان بەدەست گرفتەکانی هێڵی بەرگری دەناڵێنن.

ئێریک تێن هاخی هۆڵەندی بۆ چارەسەرکردنی ئەو گرفتە گەورەی تیپەکەی پەنای بردووەتە بەر گواستنەوەی سکالڤینی و بەرگریکارە تەمەن 20 ساڵانییەکە بە بژاردەیەکئ گونجاو دەزانێت.

هەوڵەکانی شەیتانە سوورەکان لە کاتێکدایە، یانەی ریال مەدریدیش بەهۆی پێکانی دەیڤد ئەلابا چاوی بڕیووەتە تواناکانی جۆرجیۆ و بژاردەیەکی سەرەکییانە بۆ پڕکردنەوەی شوێنی بەرگریکارە نەمساییەکە.

بۆیە پێشبینی دەکرێت لە مێرکاتۆی زستانە کێبڕکێ لە نێوان مێرێنگی و شەیتانە سوورەکان بۆ بەدەستهێنانی تواناکانی ئەو یاریزانە رووبدات، ئاتڵانتاش یاریزانەکە بەو یانەیە دەدات کە ئۆفەرێکی باشتری پێشکەش دەکات.

جۆرجیۆ سکالڤینی لەم وەرزە لە سەرجەم پاڵەوانێتییەکاندا 20 یاری بۆ یانەکەی کردووە، خاوەنی گۆڵێک و ئەسیستێکە.