دوو یاریزانی هەولێر بڕیاریان داوە یانەکە بەجێبهڵێن و ئەمڕۆ بەشداریی راهێنانەکانیان نەکرد

یاریگا –

چوار یاریزانی یانەی هەولێر بڕیاریان داوە یانەکە بەجێبهێڵن و دووانیان ئەمڕۆ بەشداریی مەشق و راهێنانەکانیان نەکرد و بۆ یاریی بەرامبەر نەفتی میسان گەشت ناکەن.

بەگوێرەی زانیارییەکانی تۆڕی وەرزشی یاریگا، هەریەکە لە رێباز عەبدوڵڵا، حوسێن جولی، محەمەد موحسین و زیدان عەبدولجەبار لە فیدراسیۆنی تۆپی پێی عێراق سکاڵایان لەسەر یانەی هەولێر تۆمارکردووە و داوای شایستە داراییەکانیان دەکەن، بەگوێرەی یاسا هەر یاریزانێک دوو مانگ مووچەکەی دوابکەوێت دەتوانێت لە فیدراسیۆنی تۆپی پێی عێراق سکاڵا لەسەر یانەکەی تۆمار بکات.

https://www.facebook.com/Yariga/posts/pfbid04HrGobAXyWohtz3XjGV7E54Nf5J4iAH8nxxvwm5TmkFmEmpSWyiuydv3zzNhSpwPl

بەگوێرەی زانیارییەکانی تۆڕی وەرزشی یاریگا، ئەو چوار یاریزانە داوای پێشەکی گرێبەستەکانیان و مووچەکانیان دەکەن کە سێ مانگە یاریزانانی یانەکە مووچەیان وەرنەگرتووە، رێباز عەبدوڵڵا و محەمەد موحسین ئەمڕۆ بەشداریی مەشق و راهێنانەکانی یانەکەیان نەکرد و بڕیاریان داوە یانەکە بەجێبهێڵن و ئامادە نین بۆ یاریی بەرامبەر نەفتی میسان گەشت بکەن، زیدان عەبدەولجەبار و حوسێن جولیش بڕیاریان داوە دوای یارییەکەیان بەرامبەر نەفتی میسان یانەکە بەجێبهێڵن.

https://www.facebook.com/ErbilSportClub1968/posts/pfbid029NAqzZGzVp1VPVbUJMbKEVPBAt8QNeg1Ztk6aotx8GNTS4fjnbdQP7LHFFM6kNRMl

پێش ئەوەی یارییەکانی خولی ئەستێرەکانی عێراق بەهۆی جامی ئاسیا بوەستێت، هەولێر رۆژی یەکشەممە دەبێتە میوانی نەفتی میسان، رۆژی هەینی بۆ ئەنجامدانی ئەو یارییە یاریزانانی هەولێر گەشت دەکەن.

رۆژی 5ـی مانگی داهاتوو دەرگای بازاڕی گواستنەوەی زستانەی یاریزانان لە خولی ئەستێرەکانی عێراق دەکرێتەوە و چاوەڕێ دەکرێت گۆڕانکاری لە پێکهاتەی یانەی هەولێر بکرێت.