یاریگا –
هاندەرانی یانەی هەولێر لەم وەرزە گلەییان لە ئاستی یاریزانە پیشەگەرەکانی یانەکەیان هەیە، ئەو شەش یاریزانە پیشەگەرەی لەم وەرزە پەیوەندییان بە یانەکەی قەڵاومنارە کردووە مانگانە 40 هەزار دۆلار مووچە وەردەگرن کەچی تاوەکو ئێستا بە هەر شەش یاریزانەکە تەنیا دوو گۆڵ و ئەسیستێکیان کردووە.
یاریزانە پیشەگەرەکان لەم وەرزە لە زۆربەی یارییەکان یەدەگن، یاسین سامیە کاریگەرترینیانە، لە 10 یاریی یانەکە بەشداریی کردووە کە لە 6 یاریی سەرەکی بووە و دوو گۆڵی کردووە، لویس ئێدوار 7 یاریی کردووە و 5 یاریی سەرەکی بووە، خەلیفە ئەبوبەکر تەنیا چوار یاریی کردووە، فرانک ئارهینیش تەنیا سێ یاریی کردووە کە دوویان بە سەرەکی بووە.
ئاداما بالۆ لەکۆی 11 گەڕ لە 10 یاریی بەشداریی کردووە و لە سەرجەمیان سەرەکی بووە، برۆنۆ بیسپۆ بەرگریکاری بەڕازیلی تەنیا یەک یاریی کردووە و دواتر ون بووە.
هەولێر لەم وەرزەی خولی ئەستێرەکانی عێراق لەکۆی 11 یاری تووشی شەش دۆڕان بووە و خاوەنی زۆرترین دۆڕانە لە خولەکە، یاریزانانی یانەکە 14 گۆڵیان لێکراوە و تەنیا 10 گۆڵیان کردووە، کەچی یاریزانە پیشەگەرەکانی یانەکە تەنیا بەشداریی سێ گۆڵیان کردووە.
