یاریگا –
یەکێتیی تۆپی پێی عێراق، بڕیارێک لە بەرژەوەندی یانەی زاخۆ دەردەکات.
لیژنەی رێکهێنانی (ئینزیبات) یەکێتیی تۆپی پێی عێراق، لێکۆڵینەوەی وردی بۆ سکاڵاکەی یانەی زاخۆ کرد و بە براوەی یارییەکەی گەڕی هەشتەمی خولی ئەستێرەکانی عێراق لە بەرامبەر شوڕتە بە ئەنجامی 0-3 هەژمار کرد.
لە یارییەکانی گەڕی هەشتەمی خولی ئەستێرەکانی عێراق، یانەی شوڕتە لە یاریگای نەجەفی ئۆڵێمپی میوانداری یانەی زاخۆی کرد و یارییەکەی بە ئەنجامی 2-0 بردەوە.
دوای یارییەکە زاخۆ سکاڵای لە دژی شوڕتە کرد، بەو پێیەی شوڕتە ناوی سێ یاریزانی بیانی تۆمارکردووە، کە ریزبەندی هەڵبژاردەکانیان لە سەرووی 90-ی فیفاوە بوو، ئەمەش پێچەوانەی رێساکانی خولی ئەستێرەکانی عێراقە.
لە یاساکانی خولی ئەستێرەکانی عێراقدا هاتووە، هەر یانەیەک دەتوانێت ناوی دوو یاریزان تۆمار بکات، کە ریزبەندی هەڵبژاردەکانیان لە سەرووی 90 پلەی فیفاوە بێت.
جیا لە بە براوە هەژمارکردنی یانەی زاخۆ، یەکێتیی تۆپی پێی عێراق یانەی شوڕتە بە بڕی 15 ملیۆن دیناری عێراقی سزادا.
