یاریگا –
راپۆرتە رۆژنامەوانیەكانی ئیسپانیا ئاشكرایانكرد، فلۆرێنتینۆ پێرێز سەرۆكی یانەی ریال مەدریدی ئیسپانی سورپرایزێكی گەورەی ئاشكرا كرد، كە پەیوەندی بە كیلیان ئێمباپێی فەڕەنسی و ئەستێرەی یانەی پاریس سانجێرمانی فەڕەنسیەوە هەیە.
لەبازاڕەكانی گواستنەوەی پێشتری یاریزاناندا بە توندی ناوی كیلیان ئێمباپێ بە ریال مەدریدەوە دەبەسترایەوە، بەڵام لە سەرجەمیاندا یاریزانەكە مانەوەی لە پاریس سانجێرمان هەڵدەبژارد.
سەرەڕای ئەوەی گرێبەستەكەی ئێمباپێ لەگەڵ یانە فەڕەنسیەكە لە هاوینی ساڵی داهاتوو بەسەردەچێت، تا ئێستا یاریزانەكە بەڵێی بۆ ریال مەدرید نەكردووە.
بەپێی زانیارییەكانی تۆڕی دێڤێنسا سێنترال فلۆرینتینۆ پێرێز لە كیلیان ئێمباپێ بێزار بووە و چیتر بۆ گواستنەوەی بە جۆش و خرۆش نیە.
لە راپۆرتەكەشدا ئەوە روونكراوەتەوە، پێرێز توڕەیە لەوەی تا ئێستا ئێمباپێ هەڵوێستی خۆی را نەگەیاندووە.
هەمان سەرچاوە ئەوەشی ئاشكرا كردووە، سەرۆكی یانە شاهانەكە بیر لەوە دەكاتەوە دەستبەرداری بیرۆكەی گواستنەوەی ئێمباپێ بێت و گرێبەست لەگەڵ ئێرلینگ هالاند، ئەستێرەی هەڵبژاردەی نەرویج و یانەی مانچێستەر سیتی واژۆ بكات.
لە گواستنەوەكانی هاوینی ساڵی 2022 ریال مەدرید دەیتوانی ئێرلینگ هالاند بگوازێتەوە ریزەكانی یانەكەی، بەڵام سەرنجی تەواوی لەسەر گواستنەوەی كیلیان ئێمباپێ بوو ئەو كات مێرینگی بەنوێكردنەوەی گرێبەستەكەی لەگەڵ پاریس تووشی شۆك كرد.
لە راپۆرتەكەشدا هاتووە، سەرەڕای سەركەوتنی هالاند لەگەڵ مانچێستەر سیتی و سەختی دوورخستنەوەی لە یاریگای ئیتیحاد، بەڵام ریال مەدرید هەوڵی تەواو بۆ بەدەستهێنانی یاریزانەكە دەدات.
گرێبەستەكەی هالاند لەگەڵ مانچێستەر سیتی لە هاوینی ساڵی 2027 بەسەردەچێت.
