کاپێلۆ ئامۆژگاری ناپۆلی دەکات چۆن شکست بە بارسێلۆنا بهێنن

فابیۆ کاپێلۆ راهێنەری بە ئەزموون باسی دۆخی تیمە ئیتاڵییەکان دەکات دوای تیروپشکی قۆناغی 16ی خولی پاڵەوانەکان.

کاپێلۆ بۆ گازیتا دیلۆ سپۆرت سەبارەت بە یارییەکەی ناپۆلی و بارسێلۆنا وتی

ناپۆلی دەبێت بەرامبەر بارسێلۆنا لە رووی بەرگرییەوە رێکخراو بێت. بارسا حەز دەکات لە ناوچەی تیمی بەرامبەر یاری بکات بە تۆپەوە و پەلە ناکەن. ئەوان یاریزانی زیرەکیان هەیە کە دەزانن لەناکاو گۆڵ تۆمار بکەن. بەڵام کاتێک تۆپ لەدەست دەدات و ناپۆلی بتوانێت یەکەم هێڵی بەرگری تێپەڕێنێت ئەوا دەتوانن راستەوخۆ تاوەکو گۆڵ نەوەستن، ئەمەش دەرفەتی ئەوانە بۆ بردنەوە.

کاپێلۆ هاوکات ستایشێکی زۆری ئینتەرمیلانی کرد کە رووبەرووی ئەتڵەتیکۆ مەدرید دەبێتەوە و وتی

ئەنجامی تیروپشکی ئینتەر دەکرا خراپتر بێت. تیمەکەی سیمۆنی یاریکردن بەرامبەریان قورسە، ئەوان لە رووی تەکتیکییەوە زیرەکن و لە دۆخێکی چڕدا یاری دەکەن، لەگەڵ ئەوەش  بە کراوەیی یاری ناکەن و تەنها بۆ ئەنجام دێنە نێو یاریگا. ئینتەر یەکێکە لە پاڵێوراوەکان بۆ بردنەوەی ناسناوەکە، پێم وایە تەنها مانچێستەر سیتی و ریاڵ مەدرید لەوان زیاتر چانسیان هەیە. چونکە سەرەڕای بەهێزی ئینتەر، ئەوان توانایەکی دیکەیان هەیە کە هێشتا ئینتەر پێی نەگەیشتووە.

دوێنێ تیروپشکی قۆناغی 16ی چامپیۆنزلیگ راکێشرا و ئەرکی هیچ کامێک لە ئیتاڵییەکان ئاسان نیە، پاش ئەوەی ئینتەر و ناپۆلی و لازیۆ بەر ئەتڵەتیکۆ مەدرید و بارسێلۆنا و بایەرن میونشن کەوتن.