یاریگا –
دوای نیوەڕۆی ئەمڕۆ شاندی یاریزانانی یانەی هەولێر بەرەو بەسرە گەشت دەکەن و رۆژی پێنجشەممە لە گەڕی نۆیەمی خولی ئەستێرەکانی عێراق دەبنە میوانی مینا.
گەرچی دەنگۆی ئەوە بڵاوبووەوە یاریزانانی یانەی هەولێر بەهۆی دواکەوتنی مووچە و شایستە داراییەکانیان، بڕیاریان داوە بۆ یارییەکەی مینا گەشت نەکەن، بەڵام دوای نیوەڕۆی ئەمڕۆ کاتژمێر 03:00 یاریزانەکان بە رێگای فڕۆکە گەشتی بەسرە دەکەن و لەسەر ئامادەکارییەکانیان بۆ یارییەکەی مینا بەردەوامن.
https://www.facebook.com/photo.php?fbid=945702833582711&set=pb.100044290096476.-2207520000&type=3
یاریزانانی یانەی هەولێر لە فڕۆکەخانەی نێودەوڵەتی هەلێرەوە گەشتەکەیان دەکەن و ئەمڕۆ دەگەنە بەسرە، بە سەرپەرشتی عەبدولقادر حوسێن راهێنەری کاتی یانەکە خۆیان بۆ یارییەکەی پێنجشەممە ئامادە دەکەن، کە تاوەکو رۆژی 18ـی ئەم مانگە شاندی یانەکەی قەڵاومنارە بۆ ماوەی هەفتەیەک لە بەسرە دەمێنێتەوە و رۆژی دووشەممە لە گەڕی دەیەمی خولەکە هەر لە بەسرە دەبنە میوانی نەفتی بەسرە.
دوای دۆڕانیان لە یاریگای فڕەنسۆ هەریری لە یاریی بەرامبەر قوە جەوییە، عەباس عوبێد و ستافەکەی دەستیان لە راهێنەرایەتی یانەی هەولێر کێشایەوە، عەبدولقادر حوسێن لە دوو یاریی داهاتوو بەرامبەر مینا و نەفتی بەسرە راهێنەرایەتی یانەکە دەکات.
هەولێر لەکۆی هەشت یاری تەنیا دوو بردنەوەی بەدەستهێناوە و بە کۆکردنەوەی حەفت خاڵ لە پلەی هەژدەمی خولی ئەستێرەکانی عێراق دێت.
