توخێل: ئالفۆنسۆ یاریزانێکی گرنگە بۆ ئێمە
یاریگا
توماس توخێل راهێنەری یانەی بایرن میونشن ئەڵمانیا، لە کۆنگرەی رۆژنامەوانی پێش یاریی یانەکەی بەرامبەر یۆنیەن بەرلین لە بۆندزلیگا، سەبارەت بە داهاتووی ئالفۆنسۆ دەیڤز بەرگریکاری کەنەدی یانەکەی قسەی کرد و وەڵامی دەنگۆکانی ئەم دواییەی دایەوە.
راهێنەرەکەی باڤارییەکان لەمبارەوە گووتی
ئەو یاریزانی ئێمەیە و گرنگیەکی زۆریشی بۆ ئێمە لە پێکهاتەکەمان هەیە. ئەو دەزانێت ئێمە چەندە گرنگی پێ دەدەین. بۆ من چەند لە گرێبەستی هەر یاریزانێک ماوە هیچ گرنگ نیە، ئەو هەمیشە لە ئاستێکی زۆر بەرزدا یاریی دەکات، متمانەم بە بەرپرسانی یانەکەم هەیە. هێشتا یاریزانێکی گەنجە و زۆرجار ئەوەمان لەبیر دەچێتەوە. لە هەموو بوارەکاندا بوار بۆ پێشکەوتنی هەیە
ماوەیەکە دەنگۆیەک بڵاوبووەتەوە کە بەرپرسانی یانەی ریال مەدریدی ئیسپانیا، لە هەوڵی ئەوەدان، بەرگریکارەکەی بایرن میونشن رازی بکەن، بۆ ئەوەی هاوینی داهاتوو پەیوەندی بە یانەکەیانەوە بکات.
