کوردستان

هەولێر گرێبەستی لەگەڵ سێ یاریكەری تازە ئیمزا كرد

(ئاكانیوز) ـ سەرچاوەیەك لە راگەیاندنی یانەی هەولێر ئەمڕۆ سێشەم ئاشكرای كرد كە یانەكەیان گرێبەستی لەگەڵ سێ یاریكەری تازە كرد، كە هەر سێ یاریكەریش كوڕە كورد و خەڵكی شاری هەولێرن.

رێبین رەمزی لە راگەیاندنی یانەى هەولێر بە ئاژانسی كوردستان بۆ دەنگوباس (ئاكانیوز)ی گوت: دوای ئەوەی لە وەرزی رابردوو لەگەڵ تیپی دووەمی یانەی هەولێر و یانەی كەركووك ئاستێكی بەرزیان پێشكێش كرد، لەسەر داوای راهێنەر نەزار مەحرووس، دوێنێ دووشەم لە بارەگای یانەكە، یانەی هەولێر بە رەسمی گرێبەستی لەگەڵ هەریەكە لە یاریكەران دیار رحمان و كۆسرەت باییز و میران كەریم ئیمزا كرد بۆ ئەوەی لە ریزی یانەی هەولێر لە جامی یەكیەتیی یانەكانی ئاسیای ئەمساڵ و وەرزی داهاتووی خولی بژاردەی تۆپی پێی عێراق یاریی بۆ یانەكە بكەن.

زیاتر گوتی: بەو سێ یاریكەرەوە، ئێستە پێكهاتەی تیپی یەكەمی یانەی هەولێر 10 یاریكەری كورد لەخۆ دەگرێ، ئەوانی تریش پێكهاتوون لە (سەرهەنگ موحسین، دیدار حامید، نەریمان خدر، میران كەریم، شوان مامۆ، نەوزاد شێرزاد و تاڵیب رەقیب).

جێی باسە ماوەیەكی زۆرە بەشێك لە جەماوەری وەرزشی و بەشێك لە میدیاكانیش رەخنەی ئەوە لە یانەی هەولێر دەگرن كە پێكهاتەكەی كەمترین یاریكەری كوردی لەخۆ گرتووە و یانەكە زیاتر پشت بە یاریكەرانی دەرەوەی هەرێم دەبەستێت.

یاریكەر دیار رەحمان لە باڵەكان یاری دەكات و لە وەرزی رابردوو رۆڵێكی باڵای هەبوو لەوەی یانەی هەولێر لە خولی كوردستاندا ببێتە پاڵەوانی خولی پلە نایاب، هەروەها لە خولی بژاردەی عێراقیشدا ئەم وەرزە لە یانەی كەركووك یاریی كرد و توانی ئاستێكی بەرز پێشكێش بكات و پێنج گۆڵ تۆمار بكات.

یاریكەری كۆسرەت باییزیش لە هێڵی ناوەڕاست یاری دەكات و لە وەرزی رابردوو لەگەڵ یانەی هەولێر لە خولی كوردستان ئاستێكی یەكجار بەرزی پێشكێش كرد و یاریزانی هەڵبژاردەی كوردستانە، هەروەها ئەو یاریكەرە بە شێوەی خواست پێوەندی بە یانەی سلێمانی كردووە بۆ ئەوەی لە یارییەكانی دواقۆناغی پاكوەكەریی یانە نایابەكانی عێراق بۆ گەیشتن بۆ پلەی بژاردە، یاری بكات.

یاریكەری میران كەریمیش لە وەرزی رابردوو لە یانەی برایەتی لە خولی پلە یەكی كوردستان یاریی دەكرد و گۆڵكاری خولەكە بوو، كە پارساڵیش هەر گۆڵكاری خولی پلە یەك و باشترین یاریكەری خولەكە بوو، پاشان چووە یانەی كەركووك و لە خولی بژاردەی عێراق یاریی كرد و توانیشی 10 گۆڵ تۆمار بكات، كە هۆكارێكی سەرەكی بوو بۆ مانەوەی یانەی كەركووك لە خولی بژاردەی عێراق لەم وەرزەدا.

کۆمێنتێکی نوێ دابنێ

کۆمێنتەکان

تاگ

بابەتی پەیوەندیدار

Back to top button
Close