یاریگا –
ئاسۆ رۆستەم لەبارەی کێشەکانی یانەی هەولێر قسە بۆ تۆڕی وەرزشی یاریگا دەکات و دەڵێت :’هیچ شایستە داراییەکم لەلای یانەی هەولێر نییە، بۆیە بایکۆتی راهێنانەکانی یانەکەم نەکردبوو، قەیرانی دارایی هۆکاری ئەنجامە خراپەکانی یانەی هەولێر نییە’.
ئاسۆ رۆستەم، هێرشبەری یانەی هەولێر لە دیمانەیەکی لەگەڵ تۆڕی وەرزشی یاریگا لەبارەی بایکۆتکردنی راهێنانەکانی یانەکە لەلایەن یاریزانەکانەوە دەڵێت :’یاریزانەکان مافی خۆیانە، یاریزانەکان پیشەگەرن و وەرزش سەرچاوەی بژێوی ژیانیانە، پارە گرنگە، کریستیانۆ رۆناڵدۆ لەبەر پارە لە مانچێستەر یونایتدەوە چووە خولی سعوودییەوە، من بایکۆتی راهێنانەکانم نەکرد و دوێنێ لەگەڵ یاریزانە پیشەگەرەکان ئامادەی راهێنانەکان بووم، چونکە هیچ شایستە داراییەکم لەلای یانەکە نییە’.
https://www.facebook.com/Yariga/videos/1343608956263392/
هەروەها ئاسۆ دەڵێت :’بەڵێن بە یاریزانەکان دراوە تاوەکو پێش یاریی هەینی بەرامبەر تەڵەبە شایستە داراییەکان بە یاریزانەکان بدرێت، بۆیە ئەوانیش بایکۆتیان شکاندووە، بەڵام قەیرانی دارایی هۆکاری سەرەکی ئەنجامە خراپەکانی هەولێر نییە، بەڵکو ئێمە کێشەی دیکەمان زۆرە، دەستەی راهێنەران و یاریزانان دەتوانن چارەسەری بکەن’.
هێرشبەرەکەی هەولێر کە لەوەتەی گەڕاوەتەوە یانەکە هیچ گۆڵێکی نەکردووە، لەبارەی ئاستی خۆی لە یانەکە دەڵێت :’پلان و لایەنی هونەری یانەی هەولێر لە سوودی من نییە و شێوازی یاریکردنی یانەکە لە بەرژەوەندی مندا نییە، ئێمە جگە لە یاریی بەرامبەر شوڕتە لە یارییەکانی دیکە ئاستێکی خراپمان پێشکەش کردووە، من هیچ کێشەیکم لەگەڵ یاریزانەکان نییە، بەڵام تەنیا ئەوەیە شێوازی یاریکردنی یانەکە لە سوودی من نییە’.
دوو رۆژی رابردوو یاریزانانی یانەی هەولێر بەهۆی وەرنەگرتنی شایستە داراییەکانیان بایکۆتی راهێنانەکانیان کردبوو، بەڵام ئەمڕۆ سێشەممە یاریزانەکان بایکۆتیان شکاند و گەڕانەوە راهێنانەکان، کە رۆژی هەینی لە گەڕی شەشەمی خولی ئەستێرەکانی عێراق دەبنە میوانی تەڵەبە.
