یاریگا
لە بەردەوامی گەڕی پێنجەمی خولی ئەستێرەکانی عێراق، یانەی دهۆک لە یاریگای خۆی بە ئامادەبوونی نزیکەی 20 هەزار هاندەر، میوانداری نەجەفی کرد و یارییەکەشی بە ئەنجامی 0-1 بردەوە.
هەر لە سەرەتای نیوەی یەکەمی یارییەکە یاریزانانی دهۆک، فشاریان خستە سەر گۆڵی بەرامبەر و دوای چەند هەوڵێکی لەسەر یەک، سەرکەوتوو نەبوون لە تۆمار کردنی هیچ گۆلێک.
نیوەی یەکەم لە کۆتایی نزیک بووەوە و لە خولەکی 43 عوسمان سانێ نایجیری گۆڵی یەکەمی بۆ دهۆکی خاوەن یاریگا کرد، نیوەی یەکەمیش بەم تاکە گۆڵە کۆتایی هات.
نیوەی دووەم یاریزانانی میوان هەوڵی زۆریاندا بۆ یەکسانکردنەوەی ئەنجامی یارییەکە، بەڵام هەوڵەکانیان بێ سوود بوون، لە بەرامبەردا یاریزانانی دهۆک بە باشی پارێزگاریان لە تاکە گۆڵەکەیان کرد.
بەم شێوەیە دهۆک سێیەم بردنەوەی ئەم وەرزەی بەدەستهێنا، هەروەها بە کۆکردنەوەی 11 خاڵ بۆ پلەی دووەمی ریزبەندی خولی ئەستێرەکانی عێراق سەرکەوتن، لەلایەکی دیکەوە دهۆک لە کۆی 5 یاریی ئەم وەرزە پێنجەم کلین شیتی تۆمار کرد، واتە هیچ گۆڵێکیان لێنەکراوە.
