یاریگا –
لیۆنێل مێسی جارێکی دیکە دەگەڕێتەوە بارسێلۆنا و بەشداری یارییەکیش دەکات.
پێگەی فووتبۆڵ ترانسفێر بڵاویکردووەتەوە، ئەفسانەی ئەرجەنتینی، لیۆنێل مێسی لە ساڵی 2024 دەگەڕێتەوە یاریگای کامپ نو، لەو یاریگا مێژووییە یارییەکی ماڵئاوایی بۆ رێکدەخرێت و بەشێوەیەکی درووست ماڵئاوایی لە یانەکەی دەکات.
بەپێی هەمان سەرچاوە، مێسی لەو یارییەدا درێسی بارسێلۆنا دەپۆشێت، بەرامبەر تیپێک یاری دەکات کە چەند ئەفسانەیەکی تۆپی پێ لەخۆ دەگرێت.
ئەو یاریزانە مەزنانەی، کە بەشدار دەبن لە یارییەکە بریتی دەبن لە کریستیانۆ رۆناڵدۆ، ریڤاڵدۆ، دەیڤد ڤییا، سیسک فابریگاس، زڵاتان ئیبراهیمۆڤیچ، گارێس بەیڵ و دەیڤد بێکهام، لەپاڵ چەند ئەستێرەیەکی دیکەی گەورەدا.
🚨 EXCLUSIVE 🚨
Messi to return to Barcelona in 2024 for spectacular tribute 😍
By @stevek9KS1TV https://t.co/Iw2nHD2Zq8
— Football Transfers (@Transfersdotcom) November 23, 2023
ئەمەش بۆ شەیدایانی تۆپی پێ دەبێت بە رووداوێکی سەرنجراکێش، بەوپێیەی دەیان ئەستێرەی مەزن لە یارییەکدا بەیەک دەگەن. تەنانەت ئەگەر یارییەکە یارییەکی فەرمیش نەبێت چێژی تەواو بە هەوادران دەبەخشێت.
مێسی ئێستا یاری بۆ ئینتەر مەیامی ئەمریکی دەکات، ئەمەش پاش ئەوەی لە ساڵی 2021 بەشێوەیەکی چاوەڕواننەکراو ریزەکانی بارسێلۆنای بەرەو پاریس سانجێرمان جێهێشت، لە چەند چاوپێکەوتنێکیشدا گلەیی ئەوەی لە یانەکەی دەکرد، کە دەرفەتی ئەوەیان بۆ نەرەخساندووە بەشێوەیەکی درووست ماڵئاوایی لە هاندەران و یانەکە بکات.
لە لایەکی دیکە خوان لاپۆرتای سەرۆکی یانە کاتالۆنییەکە چەند جارێک ئاماژەی بەوە کردووە، دوای کۆتایی هاتنی کارەکانی نۆژەنکردنەوەی یاریگای کامپ نو یاری ماڵئاوایی بۆ مێسی رێکدەخەن. بۆیە هاندەران بەم زووانە چێژ لە یەکێک لە خەیاڵیترین نمایشەکانی تۆپی پێ وەردەگرن.
